Lider di partido Curpa, Eric Ras: Gobierno a sembra biento y awor ta cosecha horcan

Nos no ta nan pero nos ta demostra di ta pio cu nan. Ta sinta tira lodo tur caminda y awor cu bo ta den candela bo kier hunga victima. Tanten cu solo no baha careda di bina no a caba. E gobierno aki cu nan manera di goberna ta demostra cu nan kier caba cu Aruba. E forma arogante di goberna ta demostra kende berdaderamente nan ta.

Sin escrupulo ora ta trata cu nos pueblo.

Tabata core rumor cu tin un investigacion andando na Arubahuis y awe por confirma cu tin base pakico e minister plenipotenciario a entrega su retiro. Su argumento cu ta pa via di kindertoelage. E argumento aki ta zona masha fofo mes. Bo no ta bay laga un salario halto pa un kindertoelage pasobra tardi of tempran bo tin cu hay’e si bo tin derecho riba dje. E pilder aki ta dificil pa traga. Minister president tin e deber pa actua den e caso aki sino e ta bira complice. E caso aki no ta un secreto publico mas. Artikel 199 di nos prodicimento penal ta bisa: Ieder, die kennis draagt van een begaan strafbaar feit, is bevoegd daarvan aangifte te doen.

No ta pasa un siman cu cosnan malo ta sali na claridad di e gobierno aki. Si sigui asina nan lo bay den guinness world records pa tanto scandal. Scandal di vacuna, na Serlimar, na Arubus, na Dimas, na Web N.V pa e cuenta di Eagle LNG, fase y asina por sigui menciona. E gobierno aki no por papia di integridad paso nan no tine. E situacion por wordo defini manera un tsunami di scandal cu a pasa riba nan.

Gastonan ta sigui subi y pa tira santo den wowonan di empleadonan publico a bin cu 5% den nan salario y e 7.6% na aña 2023. Un Parlamento cu no ta para firme y no tin control riba nan gobierno. Parlamento sa masha bon cu si gobierno no haci locual el a firma den e protocol di diabierna scur di 13 november 2020, e empleadonan publico lo no haya nada back.

Esaki ta e momento cu nos parlamentarionan cu ta bisa cu nan ta Cristian lanta para pa principionan. Demostra cu boso ta para banda di e homber chikito demostra cu boso ta para banda di pueblo y ranca e plug di gobierno. E spada di 2 filo ta corta banda banda y esaki lo bo scapa for di dje. Nos no por burla di Dios paso locual cu bo sembra lo bo cosecha. A bira tempo pa nos lanta para pa salba nos Aruba dushi tera.