Lider di partido Curpa Eric Ras: Gaña, priminti y no cumpli ta e formato di gobierno pa sigui impone medida riba pueblo

Locual cu gobierno ta haci ta cumpra tempo. Sobrina a tuma e liderazgo di partido MEP y tur locual cu su omo a logra cu lucha y sacrificio a caba na nada. BBO na frontera ta nada otro cu un otro medida mas riba lomba di pueblo. Nos pais a wordo goberna pa hendenan sin escrupulo y cu no tin amor pa nos pais. Partido MEP cu a gana eleccion na 2017 cu yen di promesa falso a sa di destrui nos isla den 6 aña di gobernacion. Partido MEP kier sigui biba di pasado y tira tur culpa riba partido AVP. Partido MEP no ta ningun santo paso si durante nan gobernacion di 2001 pa 2009 a subi mercado internacional y fia 1.4 biyon florin no por sigui tira culpa riba partido AVP cu a haci mesun cos. Durante nan periodo di gobernacion di 2009-2017 partido AVP a fia 1.8 biyon florin cu ta solamente 400 miyon mas cu partido MEP. Pueblo no mester lubida e campaña di partido MEP na 2001 declarando cu Aruba ta bancarota. Awe den 2023 partido MEP hunto cu partido Raiz ta bay den nos historia pa crea un mega debe riba 2 biyon florin y hisa nos debe nacional riba 6 biyon florin. A yega tempo pa e gobierno aki bay cas paso nan a zink Aruba. BBO na frontera lo ta e ultimo clabo cu e gobierno aki falta.

Nos prome minister tin e ley di RAFT su dilanti pa firma bij het kruisje y Tweede Kamer ta pusha van Huffelen pa pone un punto final tras di e asunto aki comokiera cu tin 3 aña di negociacion su tras y no ta mira un final riba e asunto aki. Hopi promesa haci di parti di nos prome minister na Hulanda pero te cu awe no ta cumpli cu nada na un acuerdonan haci. E holoshi ta canando y nos sa cu gobierno no a baha su gastonan y ta manera un bari sin bom ora cu ta trata placa di pueblo. Locual cu lo bay ta skirbi den historia di Aruba ta con partido MEP y partido Raiz a entrega nos autonomia y a destrui nos isla. Nos pueblo mester biba den miseria pa nos gobernantenan por biaha rond di mundo sin ningun logro. Pueblo no mester lubida e contract di Eagle LNG cu ta scondi y pueblo mester lubida riba e proyecto di hidrogeno cu lo yega aki banda na 2050. Otro mentira mas di nos minister encarga cu labor, energia y integracion.

Dia 21 di juni 2023, 21 banco a crash na Merca esey ta duna nos un indicacion cu e situacion financiero mundialmente ta birando pio. Europa y Merca ta den un recesion. Segun nos por a compronde kier introduci e dollar digital pa dia 4 di juli 2023. Nos ta den e tormenta perfecto y nos por ta sigur cu Aruba lo sinti efecto di esaki. Nos di partido Curpa ta sigui bisa cu nos isla no ta prepara pa locual lo pasa ora otro banconan cuminsa crash y ningun hende por saca placa ni swipe for di banco. Pueblo di Aruba laga nos prepara pa locual cu ta na caminda. Esaki ta e momento pa nos acerca mas cerca Dios. Fuera di esaki tambe tin scarsedad di cuminda mundialmente. Riba e tereno di alimento Aruba no ta prepara tampoco.

E momento a yega pa trece un cambio den gobernacion y haci un limpiesa completo. Partidonan politico tradicional no a sa di goberna nos isla y tampoco a sa di administra placa di pueblo. For di momento cu minister no ta respeta e ley di compatibilidad ta duna nos di compronde cu nan ta haci nan mes doño di placa di pueblo y ta falta pueblo respet. Esaki ta pasa ora partidonan cu yen di promesa falso ta logra drenta gobierno y despues ta saca nan huña y ta cuminsa goberna manera un partido comunista y ningun hende por bisa nan nada. Dios su tempo ta perfecto y awor a yega e tempo cu nan lo sinti e consecuencia di tur gañamento. B’a sembra mentira y cosecha bo mentiranan awor. Pueblo di Aruba un gobierno sin Dios ta un gobierno sin husticia. Pueblo ta sufri inhusticia na man di e gobierno aki. Partido Curpa ta e unico alternativa.