No ta di awor, pero for di hopi tempo caba partido CURPA ta bin ta señala cu riba nivel local, pero tambe mundial parce di tin un tendencia na silencia e pueblo cu e intencion pa haci e rico bira mas rico y e pober mas pober.

Riba nivel mundial “World Economic Forum” a anuncia e “great reset” despues cu lockdown a kibra economia di hopi pais. Na Canada e prome minister y mita di su gabinete ta alumno di e organisacion aki, president di Francia, Australia, Alemania y Hulanda tambe tin minister den e organisacion aki. Nos no por lubida e lema di World Economic Forum cu ta bisa: “lo bo no tin nada y lo bo ta feliz”. Esaki ta e mentalidad comunista cu kier tuma control di paisnan y asina caba cu libertad di expresion. E cos aki pa nos di partido Curpa ta inaceptabel.

Riba nivel local ta bin na mente con Parlamento, despues di nan actuacion asina bochornoso kier diripiente kier bin dicta con cos mester bay. Parlamento ta lubida cu si kier drecha mundo anto cuminsa cu bo mes. No por ta asina cu un minister ta manda un carta pa un doño di un radio emisora cu un contenido asina menasante. Si aki 3 luna bin un eleccion nos di partido Curpa lo kier mira cu ki cara nan lo cana den pueblo pa busca voto despues di asina tanto mentira y masacra cartera di pueblo. Mihor cos cu nan por haci ta deshaci di e ley di mediaraad. E no ta negociabel.

Pa colmo no ta solamente parlamento, pero tambe gobierno di Aruba ta wordo sacudi pa scandal den diferente departamento y kier tapa tur cos. Ta hopi “gate” tin. Na prome lugar ta bisto cu e gobierno falta un vision concreto con pa maneha nos pais. En bes di crea mas pilar economico pa nos isla no keda depende solamente di turismo a core firma “COHO” dia 13 di November 2020 y ainda kier hustifica un maneho di spirito door di keda critica e gobierno anterior. Pueblo a bin ta compronde sinembargo cu nan no ta mihor y cu nan ta un gobierno di desastre. Un gobierno cu a priminti cielo y tera durante campaña y cu conoce e materia bon y cu nan lo goberna cu 7 minister y sin medida, pero a haci lo contrario.

Un otro aspecto di e mediocridad di e gobierno ta e medida pa hisa grond- y inkomstenbelasting. Partido CURPA ta convenci cu e proposito di e medida ta pa kita propiedad di nos pueblo. E modus operandi aki a wordo implementa na Hulanda caba como tambe na un isla Caribeño caminda a hisa grondbelasting y esnan cu ta biba di un pensioen miserable y no por a paga e grondbelasting a haya nan mes ta bende nan propiedadnan. Nos pueblo di Aruba mester habri nos wowonan hancho pa e no pasa aki na Aruba. E negoshi tereno a haci hopi daño na nos isla.

Inflacion ta afecta tur hende. Aruba ta caro y hasta ATA mes a bin ta suplica gobierno pa trata na contene e inflacion, pasobra hasta turista a cuminsa ta keha di e prijsnan. Si turista ta keha anto imagina bo den kico nos grandinan y esnan mas vunerabel riba nos isla ta experencianado. Desempleo ta creciendo y negoshinan ta cera nan porta paso no tin placa ta lora. No por pone mas medida riba lomba di pueblo. Rothschild foundation a laga sa di ta bay tin escasez grandi di alimento e aña aki. Agricultura, cria y pesca mester haya su debido atencion.

Partido CURPA ta di opinion cu e gobierno aki simplemente mester bay cas, nan no tin Aruba na pecho. Cada dia cu pasa ta mas daño nan ta haci en bes di bon. Esaki ta e tempo pa busca Dios y di curason paso ta un tempo dificil. Nos tur ta responsabel pa nos actonan y nos lo mester duna cuenta na Dios. E ley di sembra y cosecha ta conta pa nos tur. Si bo a sembra bondad lo bo cosecha bondad. Dios su tempo ta perfecto y nos como habitantenan di nos isla stima no mester perde speransa y mantene nos fe den Dios. No den hendenan cu tin e palabra di Dios den nan boca pero ora di tuma decision ta vota na fabor di leynan cu bay contra leynan di Dios. Esakinan ta e lobonan bisti na carne.