Partido Curpa ta un partido funda riba un base cristian solido cu for di un principio a enfoca riba e papel importante cu famia tin den un sociedad y principalmente un famia cu tin como fundamento norma y balor cristian.

E famia ta e creacion di mundo. Partido Curpa ta di opinion cu e famia mester haya un lugar importante den nos pais. Un famia cu un fundeshi solido lo biba den harmonia caminda paz lo reina. Unda paz y harmonia ta reina lo tin progreso. Lo tin desaroyo y nos pais lo tin beneficio pa tur hende. Nos por grita e ora cu nos Aruba dushi terra ta un isla bendiciona.

Lamentablemente nos mester constata cu e posicion di famia na Aruba a conoce un cambio radical y no pa mihor. Nos di Curpa ta di opinion cu e motibo principal ta pasobra famianan ta perdiendo e base cristian. Ta importante pa analisa pakico e famia no ta wordo considera mas como e piedra angular di nos sociedad. No ta intension di Curpa pa busca e culpa serca e famia. Curpa ta di opinion cu e famia mas bien a bira victima di un desaroyo cu ta alehando nos di Dios. Si nos analisa e ultimo 13 añanan di gobernacion di nos pais Aruba, nos lo yega na e conclusion cu gobiernonan di boca pafor ta profesa e creencia cristian, pero ta ehecuta un maneho cu no ta sigui e leynan di Dios. Partidonan tradicional cu promesanan cu na final a resulta di ta falso.

Nos por hasi oracion pa nos politiconan pero si nan no kier cambia di nan mal caminda, nos no por cambia nan paso tur hende tin nan propio boluntad. Nos ta ora contra implementacion di, leynan cu ta bay contra e famia pero na mes memomento ta vota pa politiconan cu ideologia destructor di e famia. Ta ora pa Dios libera iglesianan den exterior di persecucion, pero ta vota pa politiconan comunista. Nos mes ta contradici locual cu nos ta hasi oracion p’e. Ta bon pa nos reflexiona riba e ladron cu a horta y ta bisa Dios pa pordone, pero na mesun momento e ta bisa Dios cu mayan e ta bay horta locual cu a keda.

Nos ta un partido pro famia y pro bida. E rosea di bida ta di Dios y no ta den nos man pa dicidi ki ora un hende mester bay for di mundo aki. Tur cu ta dicidi di kita e rosea di bida di un persona y pio un indefenso ta un criminal. Realidad di bida ta cu ora nos a bay eleccion nos pueblo cristian, cu ta un mayoria grandi aki na Aruba, ta wordo dividi pa vota pa partidonan cu ta contra principionan y leynan di Dios. E mas tristo di esaki ta cu pastornan Cristian ta dividi e pueblo di Dios. Nos ta ora como Cristian pero nos ta vota como pagano. Nos voto nos mester mir’e manera un simiya. Locual cu bo sembra lo bo cosecha. Awe nos isla tin un deficit di 128% di nos gbp y kier tira lodo riba otro mientras cu e balki ta den bo wowo. Si no ta un pueblo Cristian nos no por perece pa nos tin conocemento. Nos tur ta sufri di nos mal decision cu nos a tuma ora di vota mundano. Nos como Cristian mester lanta para y tuma nos possicion pa defende e famia orginal y ta pa esaki ta locual Dios a jama nos. Nos di partido Curpa ta kere cu pronto lo bay tin eleccion, paso tin partido politico ta hasi sondeo pa mira con e ta para den un eventual eleccion.