Un cuerpo di polis demoralisa no ta beneficia seguridad di e pueblo di Aruba.
Minister di Husticia a tene un rueda di prensa diamars 3 di mey 2022. Un rueda di prensa cu a cay den masha mal tera cerca e miembronan y a causa un disgusto grandi bao di e polisnan cu ta forma parti di nos Cuerpo Policial.

Nos por a tende e minister bisa cu e yamada pa ser un polis ta un vocacion y cu e entrega di 12.6% no ta importante. Den boca di e miembronan di nos Cuerpo Policial e vocacion di nos Minister di Husticia lo tabata un missed call of yamada perdi paso e trayectorio di nos Minister den nos Cuerpo Policial tabata hopi cortico.

No ta un secreto cu nos Cuerpo Policial ta pasando den un tempo hopi dificil. Un Cuerpo Policial cu a sa di lucha for di tempo di nos Status Aparte caminda 186 polis lo mester a traha cu alma y cuerpo pa nos Aruba dushi tera. A pesar di a entrega parti di nan salario y riba dje 8.2% di solidariteitsbelasting, polisnan a sacrifica nan famia pa nos Aruba dushi tera. Nos Minister di Husticia actual no a conoce e sacrificio aki paso e no tabata t’ey.

Partido CURPA a constata cu gobierno tras di gobierno a neglisha nos Cuerpo Policial pa falta di vision. Gobiernonan conscientemente no tabata percura pa recluta hende pa drenta scol di polis pa asina brinda seguridad na cada un ciudadano di nos isla di Aruba. Esaki ta bay bira di 5 biaha cu no ta bay tin un opleiding pa polis. Un opleiding cu ta dura 4 aña pa bo tin un polis prepara. Esey no ta nada ainda paso den e añanan nos dilanti tin como casi 20 polis cu mas di 40 aña di servicio cu lo mester baha cu pensioen paso nan tempo a yega. Unda e prioridad pa seguridad di nos pueblo y un “manpowerplanning” debido a keda?

Na 2006 un grupo di 23 polis a bay hues pa bringa pa bay un opleiding di polis paso no solamente a mira e vacaturanan cu ta bay tin den e añanan nan dilanti, pero tambe e oportunidad pa a sigui crece den rango y tuma puesto den e parti mas ariba. Durante 5 aña a bringa dilanti hues y a paga un dineral na abogado pa despues un hende cu no sa kico ta como y bebe di e trabao di polis bay papia un disparate di dilanti hues y asina perhudica e 23 polisnan aki. E polisnan aki a bringa pa e bienestar di nos Cuerpo Policial. E palabra aki a keda graba cu ta bisa:”nan sa masha bon cu nan a perhudica e polisnan, pero awor nan ta bay pasa pa bon hende”.

Awe mester duna nan rason paso e parti mas halto di nos Cuerpo Policial falta di trahadornan capacita pa sigui carga nos Cuerpo Policial. No kier a duna nan oportunidad pa sigui crece pero awe ta nan mes mester asumi e posicion paso no tin otro pa ocupa e posicion nan ey. Pa casi 10 aña ta eherce e funcion pero te awe ta haci uso di nan si. Esaki nos ta yama cheap labour. Unda tur esnan cu a bay Hulanda cu a studia pa bira inspecteur a keda awe? Nan tabata tin nos isla na promer lugar y nos Cuerpo Policial na pecho?

E districto di Oranjestad tin mas cu 36 aña cu no ta conta cu un edificio drechi pa polis. Nos por corda cu na aña 1987 mester a muda e warda di polis for di Arnold Schuttestraat pa a traha un hotel. Awor kier converti un edificio bieu den un warda di polis en bes di traha uno drechi cu ta paz den e tempo cu nos ta bibando.

E disgusto bao di polisnan ta grandi paso e trato cu nan ta haya ta malisimo. Tin hopi cos cu ta acumula y no tin oido pa nan. Ki mishi den e temponan aki cu mas 40 polis nan decreto di promocion ta mal traha y otronan cu pa via cu mester a bay den exterior pa malesa tambe ta wordo maltrata y no ta haya nan promocion. Esaki mester un momento pa reflexiona.