Nos di partido Curpa ta kere cu awor si eleccion ta cerca. E fin di gabinete Wever-Croes II ta eminente. Un berguensa ora nos tende parlamentario Berlis cuestiona minister Arends riba RWZI of e planta di purificacion. Si nos mira con RAIZ a wordo changa cu e planta di purificacion di Bubaliplas ta un berguensa.

E planta di Bubaliplas ta cay bou di DOW y DOW ta responsabilidad di minister di infrastructura. Kiermen cu e planta di purificacion di Bubaliplas lo mester cay den e presupuesto di DOW. Nos gobierno nunca a worry pa haci nada cu e planta di Bubaliplas paso gobierno ta na altura di e situacion pero no a saca un dede pa haci algo.

E gobierno aki tin 7 aña na poder y for di 2017 ta papia di un urgencia. Nos por corda riba e rapport di Carmabi cu gobierno tabata tin scondi den lachi cu a sali na cla na aña 2021. E 16 miyon cu gobierno a presupuesta pa e planta na Bubali plas nunca a yega su destino. Awor kier hinca e RWZI bou di Utilities NV cu ta cay bao di Minister di Energia y hasi’e un NV. Turistanan lo mester bay paga $20,= pa cabez. Partido RAIZ ta dies keda cu e holo stinki so y mester tuma tur critica. Por haci yen di fanfaria pero e responsabilidad ta cay back riba gobierno y e forma cu nan a changa partido RAIZ, pero a lubida cu e ta boemerang y cay tambe den scochi di partido mep. Partido RAIZ mester a guli e pilder dies pa forma gobierno? Nos no kier ta nan.

Tin mas cos ta cushina den e gobierno aki. Un partido nobo bou di nomber Futuro a mira luz di dia 14 di augustus 2023. Nan a traha scondi pero nos ta link e cu parlamentario independiente Gerlien Croes y tambe cu e minister di Economia. E netwerk rond di e partido of movemento politico aki ta mustra cu partido RAIZ ta morto. Futuro ta cla pa bay eleccion. Si nos analisa e strategia cu ta wordo usa nos ta yega na e conclusion cu nos ta den direccion di eleccion. Tempo lo demostra esaki y nos kere cu eleccion lo tuma lugar prome cu 2025.

Bou cielo lo no tin nada cu lo keda scondi. Dios su tempo ta perfecto y tur cos scondi y malo lo bin na claridad. Nos ta bibando un tempo biblico. E situacion lo bira hopi scur y lo bay dal duro paso gran parti di atencion di nos pueblo ta hinca den otro cos y nos NO ta prepara. Nos a bisa na mas cu un biaha cu economia mundial lo crash y Aruba no ta prepara. Nos ministernan incompetente ta mas na fiesta cu prepara pa locual cu nos isla lo mester bay enfrenta.

Ora e ora di berdad bati na porta di pais Aruba, nos lo mira nan sali na careda. Sabiduria di mundo lo no por pone pais Aruba riba pia paso ta e sabiduria di mundo aki a pone pais Aruba riba rudia. Aruba lo lanta ora nos hala for di nos mal caminda y arepenti di nos maldad y busca Dios di curason y bisa no na leynan cu ta contra leynan di Dios. Dios lo warda nos cu Su brasanan habri. Nos di partido Curpa ta kere cu e momento lo yega pa un cambio y cu esaki lo bay pasa. Partido Curpa e unico alternativa.