Lider di partido Curpa, Eric Ras: E supermega debe tin nomber y fam esta partidonan MEP y AVP

Nayibe Bukele, presidente di El Salvador a yega di bisa cu si no hinca man den placa di pueblo, e placa lo alcansa pa tur cos. Nos futuro generacion tin un futuro scur na man di e gobierno aki. E gobierno di e ultimo20 aña a crea debe riba debe. A haci nos pueblo di Aruba bira esclavo di debe.

Gobierno tras di gobierno di partido MEP y partido AVP ta gaba di a haci hopi inversion, pero en realidad loke a haci ta hunga Santa Claus y crea un supermega debe. Puro gañamento pero cifra ta demostra net lo contrario.

Partidonan AVP y MEP hunto a crea un debe di mas cu Awg. 5.000.000.000,=. Si conta e mas cu awg. 920.000.000,- acerca e lo yega casi Awg. 6.000.000.000,= y ainda e ta creciendo. Nos expertonan ta kere cu si partidonan MEP y AVP sigui goberna e debe nacional lo surpasa Awg. 7.000.000.000,=. Si ta asina ta papia di stima nos Aruba dushi tera? Esaki nos ta yama integridad? Puro gañamento paso keto bay ta interes personal y di partido ta loke ta sigui domina. P’esey pueblo mester habri wowo y exigi pa e partidonan baha na awa paso nan ta sink Aruba.

Nos Aruba a ricibi asina hopi entrada cu gobierno por a inverti den nos educacion, inverti den renobacionnan di nos scolnan, mihor salario pa nos maestronan, nos grandinan lo por tin un miho pensioen y onderstand, inverti den salubridad, mihor salario pa e trahadornan den cuido medico, mihor salario pa nos bomberonan, cuidador di preso, polis y empleadonan publico. Berdad si gobierno a administra placa di pueblo manera mester awe nos lo ta bibando den un Aruba di 5 strea pero gobiernonan a perde tur strea hasta esun di noord. Lo no mester a bin cu eigenbijdrage pa AZV y tampoco haci nos pueblo di Aruba esclavo di debe. Lo districto di Oranjestad lo por tin un warda di polis nobo, edificio di gobierno bon manteni, material pa bomberonan y polisnan y prison nobo. Awe nos pueblo ta biba den miseria y no tin ayudo social.

Nos pueblo lo mester puntra partidonan MEP y AVP kico nan a haci cu e 24 biyon florin cu pais Aruba a ricibi na entrada for di aña 2001 te cu awe den 2023. E gobiernonan aki no tin placa pa yega nan y nan kier bati riba nan pecho cu nan ta sirbidor di pueblo. Di tur abundancia cu a drenta den caha di gobierno solamente 600 miyon florin a wordo inverti den nos Aruba dushi tera.

Nos a yega na un crusada cu pueblo lo no por pone confiansa mas den partidonan MEP, AVP y raiz. Nan no sa kico ta amor patrio sino e amor ta pa nan mes. Mas y mas nos mester realisa cu gobierno aki no solamente a entrega nos autonomia sino a sink nos pais. E gobierno aki a bende nos isla.

Un cos ta sigur e husticia di Dios lo ta riba nan pa a masacra nos finanzas publico. Aruba ta wordo goberna actualmente pa un grupo cu a gradua na e Universidad di gañamento paso nan ta gobernantenan sin escrupulo. Ainda tin hende cu ta bisa di ta Cristian, pero ta defende nan gobierno den Parlamento. Parlamentarionan supuestamente Cristian cu a huramenta di ta sirbido di pueblo ta yuda gobierno masacra nos pueblo.

Parlamentarionan cu supuestamente di ta Cristian ta sostene un gobierno cu forma parti di World Economic Forum cu su lema ta: lo bo no tin nada y lo bo ta feliz. Parlamentarionan supuestamente Cristian ta sostene e agenda 2030 cu su meta ta destrui e famia, nos criaturanan y finalmente persigui e pueblo Cristian. Partido Curpa ta e unico partido Cristian y cu ta den e lucha pa e famia.