No haci cu otro locual cu bo no kier pa nan haci cu bo. Cada cochino tiene su sabado. Tin situacion ta mustra cu nan ta bay pa largo pero na caminda tin sorpresa. Cada problema tin nan fecha cu nan ta caduca. Aki na Aruba situacion ta mustra di ta bay di malo pa guate peor. Ora cu e granero a kere cu e ta basha su mangashina abao pa traha un mas grandi, Dios a bis’e necio awe mes lo bo muri y no a disfruta di su rikesa. Locual cu bo sembra lo bo cosecha sigur aki na mundo. Si bo ta yama pa haci bon y bo no ta hacie bo ta comete pica.
Fidel a priminti pueblo Cubano un futuro briyante pero a haya miseria. E no por a hiba su rikesa cune. P’esey Dios ta bisa cu e mentirosonan y manipulador lo no drenta e reino di Dios.
Nos di partido Curpa ta keda pone enfasis riba e Sustainable Development Goals agenda 2030 cu ta nada otro cu un plan comunista pa kita bo libertad y haci bo esclavo. E Bon Comun of Common Good ta sali for di mesun filosofia comunista cu priminti bo un futuro briyante pero na final bo ta termina den miseria y sin libertad. E concepto di Common Good ta bin for di e teoria politico usa pa entre otro Niccolo Maquiavelo, Karl Marx, Thomas Aquino etc. Un concepto completamente comunista.
Nos por mira cu den e tempo aki e color politico ta mas importante cu Dios. Hende ta papia di Dios pero nan curason ta leu di Dios. Incluso hendenan cu ta bisa di ta Cristian pero ora ta trata di nan color politico esaki ta bin na prome lugar y despues ta bin Dios. Unda bo curason ta, eynan ta bo tesoro ta. E orguyosonan Dios ta mira di leu. Locual cu ta na caminda, Aruba no ta prepara pe. Hopi lo grita y hopi lo yora pero e ora ta laat. E ta pone nos corda e tempo di Noe. Ora e porta di oportunidad cera no tin nada mas.
Aruba ta pasando den un caos y por mira decadencia den casi tur area. Nos por a scucha un voice note cu ta bay rond riba e situacion di Arubahuis. E minister plenipotenciario ta resorta bao di e cartera di minister president y esey ta haci cu na final minister president mester para responsabel. Minister president tabata na altura pero el a confia e pushi cu e pisca. Nada straño pakico nada no lo pasa cu e minister plenipotenciario. Ora ta trata di contrincante ta grita cera nan. Esaki ta integridad???? Gobierno ta castiga empleadonan publico cu belasting y e sorpresa no ta 300 florin sino hopi mas.
Un otro tema cu ta haci hopi dolor, ta ora cu un dokter ta mira placa en bes prolonga bida di un ser humano y ta lag’e muri. E dokter aki ta haci comosifuera cu e ta Dios y ta dicta. Un dokter ta huramenta pa salba bida y no pa dicidi ki ora bida ta caba. Si e dokter ta haci esey e ta un criminal paso no ta esey el a studia pe. Bida di hende no tin prijs. E cuenta di maneha hospital manera cu ta un negoshi mester caba y cuminsa na duna bida di hende balor te na su ultimo rosea. Honra e persona te na su ultimo rosea. Rosea ta di Dios no di hende.
Tin masha hopi trabao pa nos por logra pa transforma nos isla di Aruba den e perla di Caribe. Si nos cuminsa un caminda nos tin e speransa cu nos lo mira e horizonte. Nos mester di e sabiduria di Dios cu ta transforma locual cu imposibel pa hende bira posibel. Nos por a mira caba cu den coalicion no tin un muher of homber balente cu temor di Dios pa lanta para y bisa te aki e gobierno ta yega y ta pone un punto final na maltrato di nos pueblo y gobierno lo a bay cas. Dios a duna boso oportunidad pa para pa leynan di Dios y no pa forma parti di partidonan politico cu contra leynan di Dios. E ley di e matrimonio di mesun sexo lo pasa sin resistencia den Parlamento despues lo sigui esun di pedofiel. No tin ni un parlamentario cu ta sali na defensa di e famia institui den Parlamento. E agenda 2030 cu contra leynan di Dios ta sigui su rumbo den nos gobierno pa destrui nos famianan mientras cu parlamentarionan Tevreden, Berlis y Guedez ta sinta man crusa sin haci nada. Gobierno lo bin abao y boso perde e saco y cangreu. Mayoria di e parlamentarionan ta na fabor di e matrimonio di mesun sexo y lo no tin respet pa e firmanan. Dios su husticia ta husto y lo bin di sorpresa. E partidonan politico cu ta contra leynan di Dios lo no prospera sino lo mira nan derota.
