E gobierno cu ta goberna cu medida ta destrui su pais. Ni kico cu gobierno bin cune lo por yena wowo di nos pueblo. Si tin un cos cu ta molestia nos pueblo ta cu su cartera ta bashi. Pueblo a perde su poder di compra. Comerciantenan lo sigui grita paso un pueblo cu su saco bashi dificilmente lo por cumpra. Nos grandinan y esnan sin trabao y esnan cu salario minimo ta biba den miseria. Tur prijs a bay halto menos salario di e clase trahado. E BBO na frontera a caba cu nos economia.

Gobierno ta gaba di un surplus pero e presupuesto 2024 cu lo mester wordo trata den Parlamento ta un presupuesto ficticio. De e presupuesto 2024 gobierno lo paga 3% na e interes di e debe di COVID di 916 miyon florin pero gobierno a firma pa paga 6.9% na interes. Den 2024 gobierno lo mester bay paga 104 miyon florin na debe na Hulanda. Gobierno a keda bira rond y na final ta core firma 5 pa 12 e acuerdo pa paga Hulanda e 916 miyon florin cu a fia durante e COVID.

Gobierno a core firma paso Hulanda a menasa pais Aruba di pone beslag riba companianan di utilidad. Un berguensa pa pais Aruba cu ta habri man pa fia placa pero ora di paga ta mustra con mal pagado nos ta. Un placa cu a wordo malgasta pero pueblo lo mester paga. E aña aki so gobierno a fia 432 miyon florin na bonds. Gobiernonan di partido MEP y partido AVP a hinca nos isla den un debe di mas cu 6 biyon florin. Pais Aruba a haya mas cu 23 biyon florin na entrada pero solamente 560 miyon florin a wordo inverti y 97 miyon florin na proyectonan Public Private Partnership. Kico partido MEP, Raiz, por, RED y partido AVP a haci cu placa di pueblo?

Te cu e dia di awe gobierno no tin control riba su debe y riba dje tin un aumento di gastonan di gobierno den e presupuesto 2024 cu 75 miyon florin. No tin un balance budget y tampoco lo tin un surplus. A kita 12.6% for di salario y beneficio secundario di empleadonan publico, pero no kier papia di debolbe placa cu a kita durante COVID mucho menos di un indexering pa via cu costo di bida a aumenta drasticamente.

Nos tin un minister di energia cu no sa mas kico pa gaña. Lo baha awa cu coriente. Con kier baha awa cu coriente si nos companianan WEB y ELMAR ta hipoteca? Aruba su gasolin ta esun mas caro den Caribe Hulandes. Eynan nos por mira cuanto accijns ta drenta den caha di gobierno. E cherry riba e bolo ta si e prijs di petroleo pasa 100 dollar pa bari.

Economia mundial ta tambaliando y nos tin un gobierno cu no sa kico pa haci y no a traha dam warda awa. Otro siman nos lo mira kico lo pasa ora e stock market perde entre 25% pa 30%. Pa final di aña nos por calcula cu e stock market lo crash. Na aña 2008 hopi placa a bay perdi di nos fondo di pensioen. Nos ta spera cu e biaha aki no pasa mesun cos. BRICS lo drenta den luna di November y e dollar Americano lo tin un caida drastico. Den e prome trimester di 2024 nos lo mira kico lo bay pasa cu e banconan mundial. Ta calcula cu plata y oro lo subi drasticamente den prijs. Paisnan rond mundo nan wowo a habri y no ta acepta e agenda diabolico di Development Sustainable Goals y esaki lo ta su fin.

Pueblo di Aruba nos no por spera otro for di un gobierno cu ta bay contra di leynan di Dios. Awor ta turno di e gobierno aki haya lo cual cu nan merece despues cu durante 6 aña largo a maltrata nos pueblo. Dios lo no bandona esnan cu nan confiansa ta riba dje. Nos speransa mester keda den Dios paso esaki ta e tempo di esnan cu tin un curason puro pa goberna nos isla.

Sabiduria di mundo a hinca nos den debe pero cu sabiduria di Dios nos lo sali for di e debenan. Partido Curpa ta e unico alternativa.