Lider di partido Curpa Eric Ras: E aña escolar nobo lo aumenta e retonan pa maestronan y alumnonan pa falta di maneho

Un otro aña escolar ta dilanti porta. Un fecha cu ta brinda e oportunidad pa refleha riba e retonan cu nos enseñansa ta confrontando e ultimo 5 añanan cu tras di lomba. E ta di lamenta cu mester yega na e conclusion cu masha poco a wordo haci riba tereno di educacion. A basha un edificio abao den Indianenweg y te awe nada a wordo haci pa reemplasa e scol aki. Nos por mira Beaxtrix School y Juliana School te cu dia di awe ta para bashi y sin cu gobierno a haci algo pa renoba e edificionan. Tur caminda nos ta tende di problema riba e tereno di enseñansa. Nada no ta sosode sino solamente problema tras di problema cu na final di cuenta ta perhudica desaroyo di nos hubentud. Nan no ta haya un “fair chance” pa un miho futuro.

Nos por a sigui con e werksternan a wordo gaña aña pasa prome cu eleccion di dia 24 di juni 2021. A keda rek e situacion pa despues tir’e den scochi di SKOA. Mi no sa si mester yora of bati man pa un gobierno cu no ta haci nada riba tereno di educacion. Increibel pero asina ta e realidad cu nos mester biba cu n’e. Otro problema ta esunnan cu mester sigui nan aña escolar na EPB. Awor ta bin sali na cla cu no tin docente pa duna les pa esunnan cu desea di sigui studia y pasa over den futuro pa EPI. EPI tambe tin su problemanan cu n’e. Nos tin un gobierno ta manera un pronkstuk y solamente ta saca potret pero locual cu ta nos educacion ta simpelmente abandona.

Den tur e problemanan aki nos tin maestronan cu a dicidi ta basta y ta haya un miho oferta y ta bandona nos isla. Esunnan cu a bay studia pa maestronan di Papiamento awe tampoco por haya trabao. Nos di partido Curpa ta puntra nos mes ta den ki direccion gobierno kier hiba nos pais riba tereno di educacion? Partido Curpa ta pidi nos maestronan pa tene pasenshi paso un penado lo no pena pa largo. Maestronan nos di partido ta haci un apelacion na boso pa no bandona e barco. Soporta un tiki mas paso lo bin cambio.

Laga nos sigui carga nos FE den Dios cu pronto e pesadia aki lo yega na su fin. Nos maestronan ta importante y cu cambio den gobierno lo bin cambio. Nos ta kere cu nos educacion ta importante y no por keda den e situacion actual. Lo e bay tuma tempo pero lo bin cambio. Nos tene pasenshi paso lo yega e momento cu e gobierno aki lo no por haci nada mas paso nan mes a cera nan porta y pronto ta speranan caida. Despues di orguyo ta bin caida. Nos di partido Curpa ta desea nos estudiantenan tur cos bon den e aña escolar aki y tambe na nos maestronan forsa y exito durante e aña escolar.