Lider di partido Curpa Eric Ras: Curpa ta extende un palabra di gratitud na nos mamanan y ta haci e promesa pa sigui atende nan interes y di e pueblo sagradamente

Nos gobiernonan despues di Staus Aparte nunca a mustra interesa genuino den educacion di nos muchanan y e gobierno actual a “span de kroon”. Na aña 2021, nos minister president a hunga cu sentimento di e werksternan trahando pa SKOA pa haya nan vota y pa despues di eleccion laga nan na caya. E werksternan mester a cana e caminda pa corte pa asina nan haya rason. Gobierno a haya ta bon pa corta den nos educacion y awe tin un aumento drastico den schoolgeld. John Wesley College no ta keda atras y awor gobierno aki kier laga ciere pa asina hinca un otro scol den e edificio. Nos por corda cu e minister di enseñansa a usa tur sorto di argumento pa hustifica e aumento di schoolgeld cu na final a aumenta for di awg.140 pa awg.280, cual sigur ta un aumento di 100%. Durante 6 aña di gobernacion no a inverti den ningun scol y pio ainda a corta den presupuesto di educacion. Mira cuanto scol tin para bashi pa falta di renobacion.

Nos grandinan tampoco ta haya atencion di parti di e gobierno aki. SABA a bira un otro problema pa nos gobierno. Pensioen di nos grandinan no ta yega pa hiba un bida digno mucho menos pa nan por paga nan eigenbijdrage pa remedi. Gobierno no ta interesa den salud di nos grandinan. Ki sorto di gobierno nos tin? Gobierno ta prefera laga nos grandinan muri cu saca un man y brinda nan ayudo. E miseria bao di nos pueblo ta crece cada dia cu pasa y e situacion ta bira pio. Ambiente feliz ta un otro instituto mas cu ta pasa den problema. Mi ta spera cu e no bira mesun cos cu Respaldo unda gobierno a priminti di hinca 900 mil florin pero despues no ta cumpli y esnan cu mas mester di ayudo ta wordo bandona riba caya. Augustus 2023 a yega y si gobierno no cumpli lo ta un otro sla mas den cuido. Un gobierno cu no sa honra nos grandinan y duna nan un miho calidad di bida no lo disfruta di e bendicion di Dios.

Un otro problema ta e parkeermeter. Pueblo no tin placa mas y esaki a causa cu e tiki luganan cu a keda den caya grandi ta desangrando y finalmente nan lo cera nan porta. Pueblo no por biba cu tanto medida asina y otro luna e lo por bira pio ora introduci BBO na frontera. A yega tempo pa pueblo manda un señal cla y raspa na e gobierno aki esta di baha na awa. E gobierno aki no ta sirbi interes di nos pueblo sino nan propio interes. Un gobierno cu a malgasta miyones di florin di placa di pueblo no ta digno pa sigui goberna nos Aruba dushi tera. E husticia di Dios lo baha riba e gobierno aki pa tur e maltrata y abuso di poder. Laga nos keda mantene nos mirada riba Dios paso solamente Dios lo por yuda nos pa trece cambio.