Lider di partido Curpa, Eric Ras: Cumpli cu e dolor di un pueblo ta un deber di cada cristian cu ta kere den nos bon dios

CAFT ta relata cu despues di a firma e protocol di 22 di November 2018 te cu e dia di awe gobierno di Aruba ni un dia a cumpli cu palabracionnan haci por escrito. CAft tambe ta señala cu entrega di e presupuesto super laat ta haci cu ta dificil pa maneha e presupuesto di pais Aruba.

Segun e rapport di CAft nos deficit financiero lo sigui crece pa aña 2023 te cu 2026. Pais Aruba mester paga 4 biyon florin entre 2022 y 2026. Y kico gobierno ta bisa: CAft ta traha slordig y no ta responsabel pa e maneho di pais Aruba. Mientras tanto gobierno di Aruba ta sigui zink nos isla den debe.

Den presupuesto 2022 ta para cu bienes y servicio (goederen en diensten) ta subi cu 33 miyon florin compara cu aña 2021. A keda comproba cu gobierno no ta haci nada pa baha su gastonan sino al contrario ta subi nan.

Gobierno ta pidi tur hende pa sacrifica pero den nan seno ta sigui cu fiesta. Empleadonan publico ta sigui wordo engaña. Pa boicotia e marcha silencioso di sindicatonan ta anuncia cu nan lo haya na 5% den nan salario, pero con por ta posibel si e suma no ta hinca den e presupuesto di 2022. Nos no por sigui kere den webo di gay.

Pa nos di partido Curpa esaki no ta nada nobo cu bo por spera di un partido cu ta yama su mes social democrata. No tin nada social den nan pero simplemente cu engaño ta yega na poder pa despues realisa nan plan diabolico cu nan tin. No ta promer biaha cu nan ta gaña pueblo. Nan a campaña manera carne pero ta goberna manera lobo. Pueblo mester biba den miseria pero nan si ta biba bon cu tur luho cu por. Fiesta tras di fiesta pero pa pueblo no tin nada sino medida. Tur partido cu ideologia social democrata ta pensa den enrikece nan mes sin importa cu ta hinca gran mayoria di e pueblo den miseria.

Pa Hulanda ta cumbini Aruba sigui hinca su mes den debe pasobra tardi of tempran Aruba mester bati na porta di Hulanda pa placa. Eynan ta unda cu Hulanda lo tuma Aruba completamente den su poder. Nos tin un Parlamento cu no ta controla gobierno y gobierno por haci y deshaci. Si bo ta un persona cu bo a wordo poni pa haci e bon y bo no ta cumpli cune anto e ora ey lo bo ta mas culpable cu e otronan.

Nos por mira cu tanto partido mep, partido AVP y mas partido politico no tin e principionan di Dios den nan bida paso nan tur a vota contra leynan di Dios. Nan ta sigui den e mesun caminda y lo no spera nada di nan paso un dia nan lo caba na nada. Tur hende cu a bay contra norma y principionan di Dios un dia lo yega nan fin. P’esey mes un cristian cu tin Dios den su curason no por bay bao di un lider cu no tin temor di Dios y ni ta respeta leynan di Dios. Si Dios ta aborese malo y bo ta uni cu un partido cu ta apoya maldad lo bo no ta miho cu nan. Awe nos ta mira kico ta pasando aki na Aruba y tur hende ta keda keto y ta cana cu miedo pa no wordo persigui. Dios a duna nos tur oportunidad y si bo no kier arepenti, e huicio di Dios lo toca na bo porta paso nan no ta kere den Dios. Tempo dificil ta den porta y nos tur lo bay sintie. Bo por tin placa den bo saco pero si no tin cuminda, bo placa lo sirbi pa nada. Mundo henter lo bay experencia escasez di cuminda. Actualmente tin 90% na escasez di cuminda di baby na Merca.