Gobierno di Aruba ta halando su ultimo rosea? Ministernan ta biahando pa loco mientras cu nos tin un pueblo cu tin cu biba den miseria. Gobierno kier reclama Hulanda pasobra Aruba tabata esclavo di Hulanda y kier pa Hulanda exonera e 916 miyon florin cu a fia na aña 2020. A habri man tuma placa, pero awor ta mustra con mal pagado nos gobierno ta.
Locual cu gobierno no kier mira ta cu gobierno a haci pueblo di Aruba esclavo di gobierno. E medidanan tuma riba pueblo di Aruba ta pa gobierno biaha rond mundo. Ora nan ta na Aruba nan ta haya delirio pa subi avion, pero nan ta lubida cu tanto partido MEP y partido Raiz ta hala nan ultimo rosea den gobierno. E miho regalo cu pueblo por haya pa habri aña ta si gobierno pidi su retiro.
Aña ta yegando su fin y nos no a mira e caminda dilanti hotelnan grandi wordo renoba. Tin un rapport riba e planta di purificacion na Bubaliplas cu gobierno kier a sconde, pero cu a sali den publicidad. E rapport ta señala cu e planta di purificacion ta den un mal estado y cu mester wordo renoba mas lihe cu ta posibel. Mientras tanto 2 aña y mei a pasa y nada a wordo haci. Kier sigui traha mas hotel y tin hotel cu a gana caso contra di gobierno y cu daño perhuicio. E minister ta bringa Embassy Suites den corte pa proteha naturalesa, pero di otro banda e no ta haci nada pa proteha naturalesa. E minister ta debidamente na altura cu pa via di su mal maneho nos beachnan y bida marino ta wordo destrui. E minister kier punta dede riba prome minister, pero e minister mes ta sinta man crusa y laga e baca hoga. Nada. Ni asina nada ta wordo haci. Un planta cu tin e capacidad pa procesa 4300 metro cubico pero den e tempo aki mester procesa 8000 meter cubico. Gobierno ta bisa di lo hink’e bao di WEB, pero puro gañamento y nada concreto. Nos ta kere cu WEB ta hinca rand rand den debe cu nan no tin espacio pa mas debe.
E gobierno aki cu a crea GIGA DEBE den 6 aña di gobernacion. Nan programa di gobernacion ta biaha rond mundo y suta pueblo cu medida. Kier gaba cu turismo y cu hopi placa ta keda atras, pero parce e placa ta bay den un bari sin dom. No tin placa pa yega nan.
Fuera di planta di purificacion na Bubaliplas, nos por mira cu camindanan rond Aruba ta den mal estado y cu awasero ta pio so e camindanan a bira. Nos tin un centro di ciudad cu ta un ghost town y ainda mas kier cobra pa staciona. E proyecto den Columbusstraat cu ta un cos chikito no tin fin di keda cla. No a bin ningun pilar economico. Simplemente nos tin un gobierno di desastre. Problema den Saba, Serlimar, Arubus y Post Aruba NV. Tur caminda ta mira sushi paso pueblo no tin espacio mas den nan cartera.
Prome biaha den nos historia nos tin un hende muher como prome minister, pero e lo bay den historia di pais Aruba como esun cu a crea e GIGA DEBE y cu a entrega autonomia di pais Aruba. Nos prome minister a firma COHO (landspakket) cu despues a bira Onderlinge Regeling, pero nada no a cambia pasobra mayoria di e landspakketnan a wordo implementa.
E gobierno moribundo aki su dianan ta conta. Un gobierno cu no ta respeta ley di Dios su dia lo yega. Un gobierno cu ta kere di cu por haci bofon di Dios y nada lo pasa. Dios su husticia ta na porta paso un pueblo no por sigui wordo maltrata. E tempo di Dios ta perfecto. Partido Curpa ta e unico alternativa.
