Aruba a drenta su Status Aparte cu debe y medida y su debe te cu aña 2001 tabata bao di control. Na 2001 partido MEP a gana eleccion cu un mayoria di 12 asiento. For di 2004 e gobierno aki cu ayudo di un intermediario a subi mercado internacional pa fia placa. E gobierno aki a cuminsa cu e proyectonan Public Private Partnership y bao di e gobierno aki a nace BBO. E gobierno aki a cuminsa cu malgastamento di placa di pueblo y a fia 1.4 biyon florin. E Public Private Partnership ta un modelo di negoshi di Sustainable Development Goals.

Importante pa sa e berdad di Sustainable Development Goals. E ta un plan bon hinca den otro pero e resultado ta uno desastroso pa pueblonan. Tras di Sustainable Development Goals tin hendenan poderoso cu ta goberna gobiernonan rond mundo. Sustainable Development Goals ta un plan comunista cu metanan pa baha e cantidad di habitante na mundo, kita libertad y privacidad di tur hende. Hulanda tabata wordo goberna pa Union Europeo. Diferente hende di e gabinete Rutte ta forma parti di e World Economic Forum cu tin e lema: “Lo bo no tin nada y lo bo ta feliz.”* Pueblo tin cu bay biba den un asina yama 15-minute city y come carne 3D of miho bisa sintetico.

Nos gobiernonan for di 2001 te cu awe a firma diferente acuerdonan. Dia 23 di September 2015 gobierno di a partido AVP a firma pa cambia e agenda 21 pa e agenda 2030. P’esey e gobierno a cuminsa cu e parkenan di molinanan di biento y a invita Al Gore bin duna un discurso riba cambio climatico. Defunto Wubbo Ockels tambe a bin Aruba riba invitacion di gobierno. Cambio climatico ta puro gañamento paso e stikstof of CO2 ta 0.04% y si bah’e na 0.02% matanan lo muri y despues bestianan y mundo lo keda sin habitante.* Nos a wordo gaña cu tempo lo no tin petroleo mas y p’esey prijs di petroleo mester a subi. Fossil fuel ta te cu 16 mil pia y petroleo ta wordo haya na un profundidad di mas cu 16 mil pia y tin na abundancia.

Pakico a bin cambio den eleccion na Hulanda? Gobierno ta pusha kita terenonan for di e agricultornan Hulandes y e frontera habri cu yen di stranhero a haya asilo politico y gobierno Hulandes ta duna nan cas y ta mantene nan. E otro punto ta e guera di Ucrania unda cu gobiernonan a hinca hopi placa. Paisnan a manda arma di guera pa Ucrania pero esakinan a wordo bendi riba black market y a yega te na Mexico den man di cartelnan di droga. Recientemente e president di Ucrania a cumpra un boto na balor di 75 miyon di euro. E cambio na Hulanda ta pa via di e agenda 2030.

Un gobierno sin cu Dios ta central ta un gobierno caminda inhusticia ta reina. Awe nos tur ta bib’e den carni propio. Nos parlamentarionan supuestamente Cristian NO a sali na defensa di esun debil ni di esnan cu bos ta wordo silencia. Pa nan fruta pueblo por reconoce ken nan ta berdaderamente. Partido Curpa e unico alternativa.

Fact check:
*1: Segun plataforma periodistico Reuters, e declaracion di “you’ll own nothing and be happy” a surgi den un video publica na 2016 pa WEF tocante pronosticonan pa aña 2030. Den esaki, politico Ida Auken a splica con mundo por progresa si continua den e manera cu ta bayendo. Esaki a ser mal interpreta pa varios hende online como e lema di WEF pa kita propietario di individualnan. Reuters tambe ta menciona cu e controversia aki tambe a ser mal interpreta como di tin haber cu un di e SDGs, den cual ta menciona vivienda pagabel pa tur.

*2: Aunke mas stikstof den atmosfera por ta beneficioso pa e crecemento di planta, un exceso den esaki por tin efectonan contrario, den cual e atmosfera ta bira mas y mas cayente y lo resulta den consecuencianan grave pa hende, bestia y planta tambe. Ademas, segun David McGee, associate professor den e MIT Department of Earth, Atmospheric and Planetary Sciences, e preocupacion di cambio di clima ta rondona mas e velocidad cu Tera ta calentando en bes di e porcentahe.