Di 10 di mei pa 12 di mei 2023 a tuma luga e Caribbean Climate Energy Conference aki na Aruba. No a permiti asistencia di publico na e conferencia. Segun gobierno di Hulanda, lo intensifica colaboracion cu Sint Maarten y Aruba. E colaboracion lo ta uno financiero? Tambe gobierno di Aruba a declara cu lo bin expansion di e parke di biento na Rincon. Nos por corda con e proyecto di Urirama a wordo suspendi pasobra e habitantenan, apoya pa partido MEP, a protesta señalando cu e molinanan di biento ta malo pa salud di hende. Bida sa dal buelta straño, paso awor si partido MEP ta bay di acuerdo pa expande molinanan di biento no na Urirama pero si na San Nicolas.

Salud di habitantenan na San Nicolas no ta conta anto? Riba dje a bira obvio cu San Nicolas no tin ningun clase di prioridad pa e gobierno actual. Nos por mira cu no tin placa pa San Nicolas paso den 6 aña di gobernacion no tin ningun proyecto andando. A regala Citgo 175 miyon dollar y awe nos tin un ruina cu ta cay den otro riba e tereno di ex Lago y gobierno no tin placa pa haci e tereno limpi. No tin placa pa drecha scolnan y riba dje kier cera John Wesley College. Asina hopi nos gobierno ta stima e pueblo di San Nicolas.

Nos tabata tin un minister Hulandes cu a bin specialmente pa e conferencia di cambio climatico. Hulanda keto bay ta pusha pa kita terenonan for di e agricultornan Hulandes pa via cu e stikstof ta malo pa nos medio ambiente. E cambio climatico…e unico cos cu e lo bay trece ta scarsedad di cuminda. Hulanda ta productor number 2 mundialmente den produccion di cuminda. Na Merca, 1900 industria di produccion di cuminda a kima misteriosamente. No ta pasa noticia di e lucha di agricultornan. Rond mundo tin problema unda kier pa no sembra mas y no cria bestia mas pa nos tin carni. Awor media ta propaganda pa come insecto y carni artificial. Tur esaki bao di e pretexto cu e ta malo pa nos clima. Pronto lo nos tin scarsedad grandi di cuminda y Aruba no ta keda atras paso gobierno no a haci nada riba tereno di agricultura. Hopi ta warda riba un tereno huurgrond pa sembra of pa cria bestia. E meta tras di esaki ta pa tin control riba e ser humano y asina perde nos libertad.

Parlamento Hulandes lo mester trata den e dianan nos dilanti e pandemie-wet y aki ta unda gobierno lo haya e poder pa haci y deshaci. Di e forma aki gobierno ta cumpli cu palabracion haci na World Economic Forum. E organisacion aki poco poco a bin ta implementa nan agenda. Awe nos por compronde pakico nan ta bisa cu cierto bestianan y pisca ta den extincion y a pasa un ley pa prohibi pa mata nan pa come. Aruba no a keda atras. Nos por corda cu durante pandemia tambe a prohibi pueblo di pisca y mester a bay inscribi na Santa Rosa.

World Economic Forum tin su man tur caminda hinca y e gobernantenan ta balia manera nan bisa nan pa balia. Awor ta na turno punto 13 esta e cambio climatico di e desaroyo sostenibel agenda 2030. Nos gobierno ta gaba cu Eagle LNG pero te dia di awe e minister tin e contract bon scondi. Un dia e contract aki lo sali na cla y esun cu su firma ta bao di dje lo mester para pa e consecuencianan pa nos planta di awa y electricidad pero tambe pa nos isla en general. Gobierno kier gaba cu e hydrogen plant cu ta un proceso costoso y falta hopi ainda prome cu e por wordo usa. Otro gañamento di gobierno.

E dianan nos dilanti nos mester ta prepara pa locual ta e caida mundial di economia. Banconan na America y Europa lo cuminsa crash un tras di otro. Esaki nan ta yama e ‘great reset.’ Ki efecto esaki lo tin pa Aruba? Den Silicon Valley Bank y Swiss Bank hopi hende a perde nan placa. Banconan lo dal nan porta cera y lo bo keda sin placa. Pueblo sea alerta y prepara pa scarsedad di cuminda y percura pa tin cash. Dios lo saca tur cos na claridad y esnan cu a gaña y manipula nos pueblo lo cosecha locual cu nan a sembra.