Lider di partido Curpa, Eric Ras: Aruba ta core firma e onderlinge regeling awor pa si bin un caida economico mundial por keda haya ayudo Hulandes?

Dia 11 di maart 2023 Silicon Valley Bank di Merca a crash y otro 3 banco mas a sigui. Tin bisa cu den 173 pais rond mundo banconan a faya pa cumpli cu nan obligacion. E situacion mundial no a cambia.

Dia pa dia e petrodollar su balor ta cay. Paisnan manera Brasil, Rusia, India, China y Sur Africa a funda e banco BRICS cu ta cumpli cu e standard di oro. Paisnan ta bandonando e dollar y ta afilia na BRICS. Zimbawe ta un pais Africano cu su dollar tabatin balor. Despues di a los for di e standard di oro a cuminsa print placa pa loco cu a resulta den un inflacion, pa despues e placa a perde su balor.

Mesun cos ta pasando cu e dollar Mericano. Biyones di dollar Mericano a wordo manda pa Ucrania y mesun cos Union Europeo a haci. Mundialmente situacion ta birando pio. Tin bisa cu economia mundial lo desacelera cu 1.7% mundialmente den 2023.

Aki na Aruba nos por sinti cu costo di bida a aumenta considerablemente. Turismo ta bayendo bon, pero lastimamente cu gobierno no a bin cu ningun proyecto pa yuda carga nos economia. Aruba su situacion financiero ta hopi fragil. Locual ta wordo recomenda ta pa spaar den oro y plata, pasobra cu caida di economia mundial nos florin lo devalua mescos cu e dollar.

Nos por a lesa cu minister di Economia a duna Elmar NV un ultimatum te cu dia 31 di maart pa 2023 pa 12or di merdia pa duna un contesta riba bahamento di tarifa di electricidad. E minister di Economia a laga sa cu e prijs di electricidad ta un peso riba lomba di pueblo y ta sigui relata cu e concessievoorwaarden (condicion di concesión) a caduca for di dia 1 di februari 2023 y no ta mira cu Elmar NV a baha e prijs riba electricidad. E minister a canta manera un guy chogogo pa despues haya un carta for di e director di Elmar NV cu e no por reduci e tarifa di electricidad, pasobra lo pone Elmar NV den problema financiero. Nos por conclui cu e minister di Economia y e minister di Energia den e gobierno aki no ta riba mesun linea.

E minister di Economia ta papia di tin un bon relacion cu e minister cu ta encarga cu WEB NV, pero parce cu realidad ta otro. E carta di e director di Elmar NV ta laga e minister di Economia mustra malo y esaki ta demostra cu no tin unidad den gobierno. E minister di economia tabata mustra hopi rabia; nos ta kere cu el a eherce su poder den coalicion y a logra. Partido MEP a dobla y nos por a lesa cu lo bay evalua pa baha prijs di electricidad. AHATA a pidi pa habri buki y mustra e cuentanan anual di 2022. Gobierno a sinti e rosea cayente? Kico tin di sconde?

Nos ta kere cu e minister di Economia a bay tras di e palabra di e minister di Energia, pero el a dale e un dax den wowo.

Su colega minister mientras tanto ta di biahe rond di mundo. E minister aki a bay Merca, despues el a bay Ecuador pa asina logra un miho deal pa e heavy fuel oil, pero sin ningun resultado te dia di awe. Despues e minister aki ta bay Hulanda y ta bisa cu Gobierno di Aruba ta bay firma un MoU cu Hydrogen Valley di Hulanda. Awor e minister di Energia ta na Spaña. A core cu directornan di WEB NV pa logra firma cu Eagle LNG cu supuestamente lo ta un tremendo proyecto pa Aruba. Pueblo di Aruba ta cansa di e minister di Energia aki cu ta papia bunita y hopi, pero sin haci nada. Hopi scuma pero nada di chuculati.

Mientras pueblo ta sufri, gobierno ta biaha y ta fiesta. Tur siman tin biahamento. Si nos mira rond di nos, nos por mira cu nos isla ta bayendo atras bao di e gobierno comunista aki. Ta papia hopi sin haci nada. Nos ta kere di berdad cu gobierno comunista aki ta cumpliendo cu e lema di WEF, esta pueblo lo no tin nada y pueblo lo ta feliz. Pueblo di Aruba laga nos sigui lucha y cu poder di Dios nos lo libra di e gobierno mas malo den historia di Aruba. E por tarda, pero nan dia lo yega.