Nos di partido Curpa kier a desea henter pueblo di Aruba un Feliz Aña 2024. Cu paz, amor y prosperidad reina den cada hogar. Laga nos mantene nos confiansa den Dios, pasobra 2024 lo bay ta un aña cu hopi reto su dilanti.

E debe nacional a aumenta. Na aña 2001 e debe di pais Aruba tabata mas o menos 1 biyon florin y awe el a surpasa 6 biyon florin y mas tristo ta cu colamento 560 miyon florin a usa pa proyecto. Tur placa cu pais Aruba a ricibi cual ta mas cu 24 biyon florin lo no tabata tin mester di fia placa pa ningun proyecto. Locual cu nos pueblo no mester perde sinembargo ta speransa. Nos fe lo yuda tene nos riba pia en espera di e cambio tan necesario. Penado lo no pena pa largo. Tur producto tin un fecha di caduca, asina tambe nos problemanan.

Nos por a lesa den medionan di comunicacion cu Amsterdam Manor a gana un caso contra di gobierno encuanto e holor stinki cu ta sali di Bubaliplas. Un hotel cu pa mas cu 20 aña a lucha contra di gobierno pa mal maneho. Nos por mira cu gobierno tabata hopi dehado y no sa pa cuida nos unico pilar economico. Unda e prioridad di gobierno a keda? Gobierno ta gaba cu turismo ta bay bon, pero di otro banda no sa di cuida e galiña cu ta pone e webo di oro. Nos gobierno a malgasta mas cu 5 biyon florin y e mas tristo ta cu no ta mira unda e placa a bay. Un gobierno cu no tin control di su gastonan y cada bes ta bin cu mas medida. Un gobierno cu ta maneha finanzas publico manera un bari sin bom. Hopi tristo ta cu gobierno ta bisa cu nos hendenan ta central y ta trata na yena nan wowo cu un miserabel aumento di pensioen, pero ta maltrata nos grandi y esnan cu no tin trabao. Nos grandinan mester paga pa nan propio remedinan y biba di un pensioen miserabel. Si tabata tin administracion di placa di pueblo lo nos grandinan lo por a hiba un bida digno despues di a contribui cu nos isla. Placa lo a yega pa a duna nos grandi un bon pensioen y nan lo no mester paga pa nan propio remedi. Tur placa cu pais Aruba a ricibi cual ta mas cu 24 biyon florin lo no tabata tin mester di fia placa pa ningun proyecto. Nos por papia aki di amor pa patria of ta traicion na bo isla!!!!

Nos di partido Curpa ta kere cu mester sondea pa bin cu cambio den nos Constitucion pa asina pone e parlamentarionan responsabel pa ta tapa e mal maneho di gobierno manera cu tabata e caso Lee Tofanelli, Eagle LNG, 175 miyon dollar di CITGO. Tambe esnan cu ta den e diferente hunta di supervision cu mester controla e empresanan estatal di gobierno ta responsabel pa mal maneho den e empresanan aki. E ministernan mes lo laba man. A yega ora pa trece cambio pa asina salba nos Aruba dushi tera pa nos pueblo por biba den paz y trankilidad. Un gobierno cu un bon maneho lo trece e paz y trankilidad. Aruba mester cera su frontera pa asina nos no perde nos cultura y nos propiedadnan. Bendemento di nos propiedadnan cu stranhero ta haci cu aki poco tempo yiunan di tera lo no tin cas mas. Mester bin un maneho dedica na promove agricultura y cria. Aruba no ta produci ningun cuminda y nos pueblo lo sinti e efecto aki sigur. Partido Curpa ta di opinion cu no por sigui importa trahadornan for di exterior pasobra nos infrastructura no por carg’e mas. Si sigui asina lo tin mas stranhero cu ta traha cu yiu di tera cu lo nifica cu un suma substancial di nan entrada lo bay pa yuda nan famia den exterior y no ta wordo inverti aki. Ta di lamenta cu nos gobernantenan NO tin Aruba na pecho.

Nos sa cu e matrimonio di mesun sexo of geregistreerd partnerschap a trece problema entre partido MEP y Raiz. Parce cu no tin amor mas. E discusion a bay asina leu cu poco poco lo no ta bay tin comunicacion mas y esaki lo ta fin di e gobierno aki. Dios ta pone y ta kita gobierno y e tempo pa fin di e gobierno aki, ta acercando . E recesion mundial lo bay ta e cherry riba e bolo pasobra e lo pone un peso mas pisa riba nos gobierno. Banconan lo bay collapse y hendenan lo no por saca placa for di nan cuenta bancario. Dios su tempo ta perfecto y nos mester keda tene nos mirada riba Dios pasobra solamente Dios tin contesta pa nos problemanan. Partido Curpa ta e unico alternativa.