Lider di Partido AVP Mike Eman: “Prome minister ta celebra su fracaso a costo di dolor cu e mes ta causa den pueblo”

E rapport cu  Banco Central di Aruba recientemente a publica over di opinion di consumidornan den e di tres kwartaal di 2019, ta motibo di gran preocupacion no solamente pa partido AVP, pero tambe otro instancianan cu ta mira e resultado aki como uno hopi negativo. Segun lider di partido AVP, Mike Eman e “Consumer Confidence Survey’ a bolbe revela pa di tres reportahe sigui pa e aña aki, un caida formal den e poder di compra y otro desaroyonan economico cu ta wordo afecta pa e maneho di e actual gobierno di Aruba.

E analisis di BCA segun sr. Eman, ta confirma cu tin un caida grandi den e confiansa cu pueblo tin den presenta e y den futuro di e pais. E sentimento y opinion di ciudadanonan aki na Aruba awor aki ta sumamente negativo y ta debi na circunstancianan di bida cu nan ta aden na e momentonan aki.

Mike Eman: “E rapport di Banco Central cu ta mustra riba e falta di confiansa grandi cu tin den comunidad, ta trece nos na e tema principal di discusionnan politico durante e dianan aki, cu ta ‘voorwaardelijke aanwijzing’ cu e gobierno di Aruba a haya, e forma con gobierno ta acercando e retonan di presupuesto y con gobierno di MEPORED ta hiba e deliberacionnan cu Hulanda.

Durante di nos periodo nos a logra di reduci e deficit di pais Aruba entre 7 pa 8% na 2009 ora nos a drenta gobierno. Na 2015 nos a bah’e na 3.5%, na 2016 nos a bah’e na 2% y nos tabata na caminda pa bah’e na 0.5% na 2017. Anto esaki ta cu cifranan certifica di CFT!

Den rapportnan di Rekenkamer a resulta despues cu tur dos e normanan aki, tanto e 3.5% como e 2% di 2016 tabata mas abou cu 2%. CFT a certifica cu nos gobierno a logra e reduccionnan di e deficit den presupuesto.”

Reduccion di deficit sin medida.
E lider di AVP a sigui mustra cu si mira esaki den porcentahe, e reduccion di deficit cu gobierno di AVP a realisa, di 9 pa 5 pa yega 3.7 y despues yega 2%, ta mucho mas grandi cu locual gobierno di MEPORED ta purba logra awe. Ariba dje tur hende por mira y sinti cu e reduccion  di 1 of 2% di e deficit, ta bayendo acompaña cu un cantidad di medida cu tin henter comunidad strangula. Esey no a sosode bou gobierno di AVP!

“Eynan ta e diferencia di nos gobernacion y e gobernacion actual. E gobierno di MEPORED un bes mas a adopta e modelo di medida en bes di haci loke Gobierno di AVP a haci, esta di enfoca riba crecemento economico, pa hiba Aruba dilanti, crea cupo di trabou, crea crecemento economico, crea miho distribuido di entrada den nos comunidad, pa asina tin un miho calidad di bida y un bon poder di compra di nos conciudadanonan.” Loke ta bon di e modelo di crece na luga di medida ta cu na mes momento cu economia ta crece, gobierno ta haya mas entrada pa e por reduci e deficit. Ta parce cu gobierno di MEPORED ta prefera di tuma medida riba pueblo. Mike Eman: “E modelo di crece y hiba pais y pueblo dilanti ta e modelo cu nos di AVP a para pe durante di tur nos añanan di gobernacion y cu exito.” Enberdad den tempo di gobierno di AVP por a mira tur rond di Aruba crecemento economico, inversionnan tumando luga, mas hende tabata haya trabou, poder di compra tabata wordo fortifica y awe tur hende por mira e metodo di partido MEP, cu ta e mesun cu nan a adopta den pasado y cu e mes un sorto di medidanan riba pueblo. Segun e lider di AVP esaki no ta nada straño mirando tur e ex ministernan cu nan tin ta cana rond como conseheronan den e gabinete aki. Nan simplemente a tuma over y sigui cu loke nan tabata haci den nan periodo di gobernacion for di 2001 pa 2009. Nan a sigui cu e gobernacion di tuma medida! Anto awor ta hasta celebra cu nan ta tuma medida y causa mas dolor den pueblo!