Sufrimento di pueblo ta den tur bario rond Aruba y tambe na San Nicolas esaki no ta diferente, mirando e aumento drastico di costo di bida den ultimo 22 luna di gabinete Wever-Croes.
Lider di AVP, sr Mike Eman hunto cu parlamentario Mike de Meza y mas miembro di AVP a comparti y scucha un cantidad grandi di habitantenan cu a duna acta di presencia den oranan tempran di mainta na cas di famia Tromp, pa papia riba e situacionnan dificil cu pueblo ta pasando aden y para banda di e lider di AVP, Mike Eman y partido pa defende nan den e causa di buskeda di un trato husto.
“Nos ta scuchando e inkietud cu tin den pueblo tur caminda y hunto cu varios miembro di partido AVP y habitantenan di San Nicolas, ta vociferando e inkietud aki den nomber di mama- y tatanan, abuelo- y abuelanan, kendenan ta sufriendo na man di e aumento dramatico di costo di bida cu Aruba a conoce e ultimo aña y mey cu ta tras di lomba cu medidanan cu gobierno a impone.Unda cu nos yega nos ta tende con nos conciudadanonan ta sinti nan mes sumamente defrauda y na mes momento hopi preocupa y nos a mira cifranan tambe di gastonan caminda un hende por cumpli cu su existencia minimo, pa un persona tabata 2000 florin y awe a bira 2300 florin. Pa cuater persona, esta dos adulto y dos mucha, e cifra tabata para na 4.300 florin y awor a bira 4900 florin, cual ta un aumento di 600 florin pa cada famia.
Nos a papia cu abuelo- y abuelanan, cu mama- y tatanan kendenan a bisa nos cuanto un abuelo tin cu coi for di nan pensioen pa asina yuda nan yiu kende na nan turno ta yuda nan yiunan, pa nan por atende scol. E gobierno aki ta creando un pobresa grandi y na San Nicolas esaki ta wordo hopi sinti tambe caminda placa simplemente no ta yega, pa motibo di tur e medidanan cu gobierno a impone y ora cu mira e aumento di gastonan, aki tin cu papia di 15% pa 20% y pueblo simplemente no por mas.”
Gabinete Wever-Croes a papia di un crisis social, pero e crisis social mas grave cu por tin den un pais, ta ora cu tin hamber y pobresa y esey ta loke e gobierno actual ta creando na e momentonan aki.
Eman ta lamenta e hamber y pobresa cu e gobierno ta creando den nos casnan y asina insiguridad y un sentido di incertidumbre caminda bo no sa con mayan lo ta, no tin siguransa con bo por alcansa e base minimo pa un existencia husto y esaki ta algo cu ta preocupa nos masha hopi, e lider di AVP, mr. Mike Eman a expresa hunto cu parlamentario Mike de Meza.
E ta preocupa tambe henter pueblo di San Nicolas y pariba di brug y nos a para hunto cu nan pa expresa e inkietud aki y nos ta kere cu esaki ta bibando tur bario di Aruba.
E gobierno aki a bisa cu e ta tuma medida pa paga debe y locual e ta haciendo ta creando debe pa famianan na Aruba, caminda e unico debe cu e gobierno aki ta pagando, ta e debe di nan propio famia.
“Si bo mira con gastonan di personal a subi, con gastonan di oficina a subi, con e biahamento a subi, por mira cu tur e placa di medidanan, ta bay no pa paga ningun debe pero pa enrikece famianan di e gobierno aki.
Pa nos di AVP esaki ta un inkietud hopi hopi grandi caminda e crisis social ta e hamber cu tin den pueblo, e pobresa cu tin den nos comunidad y si mira internacionalmente ‘sustainable development goals’ e 17 metanan di mundo, dos ta e principalnan cu ta papia di pobresa y hamber y esaki ta locual e gobierno aki ta creando.
E aumento aki di costo di bida, ta afectante tambe tur hende, di hendenan di clase mediano te cu nos pobernan y esaki ta motibo c’un grupo di ciudadano pariba di brug na San Nicolas, a bin para awe hunto cu AVP, pa expresa loke nan a bin ta pasando y pa partido AVP articula na dolor y ta loke nos a bin haci awe y lo sigui haci den dianan nos dilanti,” lider di partido AVP a declara.
Comments are closed.