(AP)—E lider di oposicion di Sur Korea, Lee Jae-Myung, a ser hinca den nek pa un homber arma anonimo cu a purba mat’e durante su bishita na e ciudadnan di Busan diamars, segun polis.
Lee di 59 aña, ken ta hefe di e partido mas grandi den oposicion, a ser translada na un hospital na Seoul despues di a haya tratamento di emergencia na Busan. E partido di Lee a bisa un rato despues cu e tabata recuperando na un unit di cuido intensivo na e Seoul Nacional University Hospital despues di un operacion di dos ora.
E atake sosode mientras Lee tabata canando entre un grupo di reportero y otronan despues di un tour di e sitio proponi pa un aeropuerto nobo na Busan. E atacado a acerca Lee, bisando cu e tabata kier su firma, despues a hinc’e den banda robes di su nek, segun agente policial mayor di Busan Sohn Jae-han. Sohn a bisa cu oficialnan di Lee su partido a domina e atacado prome cu polis a deten’e. e a bisa cu 41 agente policial a ser desplega na e area pa control y maneho di trafico.
Sohn a bisa cu e sospechoso, di aproximadamente 67 aña, a conta investigadonan cu el a cumpra e cuchiu di 18 centimeter online. Sohn a bisa cu polis ta investigando e motibo pa e atake. Otro agentenan a confirma cu ta anticipa pa polis pidi pa detene e sospechoso formalmente pa intento di asesinato pasobra el a conta e investigadonan cu el a purba mata Lee.
E Partido Democratico di Lee a yama e incidente “un atake di terorismo contra Lee y un menasa serio pa democracia.” El a haci un yamado na polis pa conduci un investigacion detaya y lihe. Polis y oficialnan di emergencia a bisa prome cu Lee tabata consciente despues di e atake y e no tabata den condicion critico.
Presidente Yoon Suk Yeol a expresa preocupacion tocante e salud di Lee y a ordena autoridadnan pa investiga e atake, bisando cu violencia asina no lo ser tolera, segun su oficina. Lee a perde e eleccion presidencial contra Yoon pa un punto di 0.7%, e margin mas chikito den un eleccion presidencial na Sur Korea.
Encuestanan publico recien a indica Lee y su rival mas grandi Han Dong-hoon, un ex-minister di husticia, ta e dos faborito pa sucede Yoon como presidente ora su termino di cinco aña caba na 2027. Desde su perdida, Lee a keda un critico streng di e politicanan di Yoon. Aña pasa, Lee a organisa un welga di hamber pa protesta loke el a yama e fracaso di Yoon pa opone e desperdicio di Hapon di awa sushi radioactivo for di su planta di poder nuclear na Fukushima, su maneho di e economia Sur Koreano despues di pandemia y su politicanan streng riba Nort Korea.
Lee ta enfrenta un cantidad di acusacion di corupcion, incluyendo cu el a provee fabornan inhusto na un inversor priva cu a haya ganashinan grandi for di un proyecto di vivienda sospechoso den e ciudad di Seongnam, unda Lee tabata alcalde pa un decada te cu 2018. Lee a nenga cualkier eror legal y a acusa e gobierno di Yoon pa persigui venganza politico.
