Lider di oposicion y alabes lider di fraccion di AVP, mr. Mike Eman, awe a expresa su preocupacion profundo pa loke ta e decadencia social creciente na Aruba. E ola recien di acontecimentonan tragico, di agresividad, di suicidio tragico entre hobennan, di kiebro den famia y empobrecimento di sociedad ta indicacionnan doloroso di e maneho deplorabel di Gabinete Wever-Croes. E maneho di e actual gobierno cu su medidanan riba impuesto a conduci na consecuencianan social-economico serio y un crisis di pobresa creciente.
E aumento di casonan di agresividad, depresion y casonan tragico tin indudablemente su efecto riba nos comunidad. Como lider di oposicion y representante di pueblo, mr. Mike Eman ta sinti e deber moral pa trece e consecuencia di maneho cuestionabel y preocupante di Evelyne Wever-Croes aki dilanti. Ta urgente pa bin un cambio pa nos lucha pa un solucion mas efectivo y responsabel di parti di gobierno.
“E actual gobierno a faya den proteha nos comunidad contra e consecuencianan devastador di agresividad y fracturacion social,” Eman ta declara. “E acontecimentonan tristo ta refleha claramente riba e fayo di maneho di gobierno Wever-Croes, cu a contribui solamente na aumenta pobresa y kiebro di famianan.” E consecuencianan devastador di e maneho di Evelyne Wever-Croes tin tambe consecuencia riba e salud mental di e comunidad.
Lider di oposicion, mr. Eman ta mustra riba e cambionan cu mester bini unda ta pone Pueblo y Pais na prome lugar, unda ta pone e bon comun como linea di guia pa brinda prosperidad y perspectiva. Gabinete Wever-Croes a hinca Aruba den un spiral di deterioro y decadencia. Aruba mester di un maneho economico mas inclusivo dirigi riba enseñansa, cuido di salud y bienestar social ta necesario den forma urgente pa proteha y promove nos comunidad. Asina so nos por cana e caminda di recuperacion.
“E horcan perfecto cu e maneho di Evelyne Wever-Croes a crea ta conduci tambe na e crisis serio riba tereno di salud mental y riba nos isla,” Eman ta señala. “E desesperacion continuo tin consecuencianan tragico entre nan un crecemento di depresion, desesperacion y agresividad.”
“Nos no por keda neglisha tur esaki”, Eman ta enfatisa. Como sociedad nos mester bin hunto cambia rumbo y fiha un maneho cu ta brinda speransa, perspectiva y sosten na tur esnan cu mas tanto mester di esaki.”
“E cohesion social mester wordo recupera y nos esfuersonan mester ta dirigi riba hisa e standard di bida pa nos ciudadanonan,” Eman ta splica cu firmesa. “E tempo a yega pa un cambio di rumbo, un rumbo cu ta conduci na un Aruba mas sigur, mas prospero y mas saludabel pa tur hende.”
Como lider di oposicion, mr. Mike Eman ta priminti di haci tur su esfuerso den forma incansabel pa e pueblo tin un bos cu ta representa y bringa p’e pa un miho futuro. Fraccion di AVP lo percura pa un liderazgo responsabel y firme pa saca Aruba di e crisis cu e ta den y pone nos Pais riba un rumbo cu bon comun como e guia principal.
