“Den e dianan aki diferente empresa a manda notifica nan clientenan cu nan ta bay subi nan prijs, pasobra e introduccion di 7% BBO na frontera a subi nan costo di operacion cu nan tin cu pasa pa e cliente. Pero Gabinete Wever-Croes tur tempo a keda insisti cu e 7% BBO na frontera lo no tin efecto riba prijs. Awe lo contrario ta resulta atrobe; companianan ta informando clientenan di aumento pa motibo di e 7% BBO na frontera”, Asina mr. Mike Eman a declara na Prensa den fin di siman.
Gabinete Wever-Croes a causa un tormenta pa pueblo
Como lider di fraccion di AVP y lider di oposicion, mr. Mike Eman ta mustra cu e tin un preocupacion grandi cu e forma con Gabinete Wever Croes II, a bin ta birando lomba pa pueblo di Aruba y no ta wak kico ta biba den pueblo y comercio. Na e mes momento Eman ta señala cu comunidad di Aruba, pa algun tempo caba a bin haya su mes cu medidanan di Gabinete Wever-croes den locual por wordo considera e “perfect storm” di problemanan social- economico. E mesun gobierno cu ta causando e problemanan aki ta fayando barbaramente tambe pa reconoce e consecuencianan di nan maneho y no ta atende cu tur reto cu tin pa Pueblo.
E “tormenta perfecto” aki, ta wordo caracterisa pa dolor, pena, pobresa falta di perspectiva y tambe fracturacion den famia y barionan.
Desolacion den pueblo
“Nos ta constata un bashi, un perdida grandi pa loke ta confiansa basico cu mester existi y ta forsa di cualkier desaroyo den nos pueblo. Nos por mira tambe un buskeda pa tapa dolor cu actividadnan momentaneo cu no ta mehora e situacion di nos hogarnan. Na final e scapadanan momentaneo ta conduci na mas reto socio- economico pa familiarnan na Aruba, cual lo engrandece ainda mas e sentimento di abandono aki di parti di gobierno. Nos ta mira un preocupacion creciente di nos hendenan pa loke ta pobresa den nos pais, e desintegracion social, aumento di crimen y un fracturacion di balornan. Hasta e clase media ta den un lucha di sobrevivencia.
Insiguridad combina cu ausencia total di perspectiva
Na e momentonan aki ta reina un sentimento di insiguridad riba kico futuro di e calidad di bida lo bay ta. Tin un falta total di un entrada cu ta alcansa e gastonan mensual pa miles di famia na Aruba. Tur cos ta sigui subi y no tin ningun indicacion con e poder di compra lo por wordo recupera na man di un gobierno di medida. “Ta bisto cu confiansa di consumidornan ta na un punto hopi abou y e proceso di deterioro fisico ta bisto den diferente sector di nos comunidad. Tur esaki mientras cu comunidad ta enfrentando un aumento continuo di un grupo grandi di ciudadanonan cu ta bibando cerca of bou di loke ta e limite di pobresa”, mr. Mike Eman ta enfatisa
Mester codifica bestaanszekerheid y introduci Sociaal Cultureel Planbureau
Hustamente pa evita e locual un gobierno manera Gabinete Wever-Croes por causa na dolor y sufrimento den pueblo e ta importante pa pone den Constitucion e responsabilidad di un gobierno pa percura e “bestaanszekerheid” di Pueblo, e lider di oposicion mr. Mike Eman ta enfatisa. E ta bisa cu fraccion di AVP ta trahando riba un reforma legislativo asina pa ancra “bestaanszekerheid” den constitucion pa fortifica e obligacion di gobierno pa percura pa e existencia basico di pueblo. Locual nos ta bibando awe na sufrimento y negligencia a yega di sosode den mas gobernacion di signatura di MEP.
Tambe mr. Eman ta mustra cu e situacion actual ta accentua tambe e necesidad di un instituto manera cu a fraccion di AVP ta propone pa Aruba, esta un Sociaal Cultureel Plabureau Aruba (SCPA). Un instituto asina cu estudionan lo trek aan de bel ora tin tipo di negligencianan socioeconomico asina, e ta bisa. P’esey AVP lo busca “draagvlak” den comunidad pa bin cu un SCPA.
Ta momento pa nos re-descubri nos vision comun y inverti den e bienestar general y e momento a yega pa cambio, caminda nos tin cu uni forsa y traha pa un futuro positivo pa nos pais,” e lider di oposicion, mr. Mike Eman a finalisa bisando.
