Ultimamente Partido MEP ta hayando hopi reaccion di tanto sostenedonan di Partido y medionan di comunicacion si ta berdad cu Lider di MEP, Evelyn Wever-Croes of integrantenan di Partido MEP lo a sinta cu señor Otmar Oduber.
For di un entrevista recien, hopi hende lo a comprende cu señor Oduber lo a vocifera cu hendenan yega na partido MEP lo a reuni cune pa discuti pa traha hunto den Partido MEP.
Lider di MEP durante e conferencia di prensa di Gobierno di Aruba diaranson 31 di juli, a haya e pregunta aki for di un miembro di prensa kende a puntra si Otmar lo a acerca Lider di MEP of Partido MEP. Lider di MEP a enfatisa cu e no tin motibo ni intencion pa acerca señor Oduber tampoco pa papia cune.
“Partido MEP tin suficiente candidato bon prepara riba lista y un lista largo di candidato nobo cu kier subi lista y cuminsa nan carera politico cu partido Movimiento Electoral di Pueblo. Mi no a papia cu Señor Otmar Oduber riba e tema aki, mi no tin motibo pa hacie y lo mi no hacie tampoco. Y absolutamente ningun hende den MEP tin mandato pa papia cu Otmar Oduber pa subi lista di MEP”.
