Lider di MEP: ‘Deficit di casi 200 miyon tabata un sorpresa pa nos’

Despues cu lider di MEP Evelyn Wever Croes a ricibi informacion for di informador di e situacion financiero, el a indica cu esaki tabata un ‘sorpresa’ y cu esaki ta e ‘reto mas grandi pa e gobierno nobo’.

Siman pasa e director di Departamento di Financia a bisa despues di consulta cu Gobernador cu e situacion financiero di Aruba no tabata asina alarmante. Nos a puntra den un entrevista cu sra. Wever Croes despues kico e ta pensa di e expresion di e director aki. El a reacciona cu e ta mustra ‘positivo’ sinembargo nan kier sa mas detaye como cu como parlamento nan no a ricibi e ultimo cifranan.

Awor den e carta di e director di Financia mes por les cu tin un buraco di 195 miyon florin. Y awor lider di MEP ta bisa: “Nos tawata na haltura cu e situacion financiero ta hopi malo por lo tanto esaki no tawata un sorpresa pa nos. Sinembargo e suma si tawata un sorpresa grandi pa nos.”

E echo cu gobierno di AVP a laga esaki y cu nan no a entrega e presupuesto 2018, segun sra. Wever Croes ta ‘complica e comienso di un gobierno di coalicion’. “Pero no ta imposibel. Pa cuminsa, ta importante pa nos haci un quick scan pa sa unda realmente nos ta para financieramente, informa comunidad di e resultado di esaki y di aki nos lo sigui traha riba nos plannan di solucion cu nos ta desea pa nos pais.”

Reaccion riba ‘coalicion no stabiel’

E lider tambe ta reaccion riba un relato cu AVP a manda (ayera den nos edicion riba pagina 32) unda e partido a informa na Gobernador cu ‘ un coalicion MEP-POR lo nifica instabilidad y intrankilidad na Aruba’.

“Mi ta kere cu partido AVP ta liber pa expresa su mes pero aki no ta trata loke AVP ta kere of pensa, sino e respet cu nos ta mustra na e decision di nos pueblo cu a vota pa un coalicion”, asina sra. Wever Croes ta comenta.

E ta sigui cu: “Nos ta reconoce cu un gobierno di coalicion no ta mes stabiel cu un gobierno cu un mandato absoluto. Nos sa tambe cu un coalicion semper ta trece cu ne mas checks and balances pero tambe nos sa cu esaki lo tin mas riesgo. Y esaki ta conta pa partido AVP tambe cu esnan cu nan kier forma cu n’e. Awor diripiente AVP kier forma gobierno, y e mesun instabilidad aki lo conta pa nan tambe.

Pa e motibo aki, ta hopi importante pa expresa cu cualkier convenio cu nos yega na dje cu cualkier partido, lo ta basa riba e hecho cu nos tur kier un gobierno stabiel, firme y duradero cu lo sinta e 4 añanan aki y cu por tuma decisionnan cu pais Aruba tin mester di dje.”