Lider di MAS: Tin diferencia entre color di partido y di ‘stembiljet’

Conflicto entre partido MAS y partido POR pa por uza color blauw scur como color di partido a wordo resolvi. Rason a wordo duna na MAS pasobra e partido a registra nan marca prome na bureau di propiedad intelectual. Sinembargo lo mester tira lot na momento di determina color di ‘stembiljet’.

Bon Dia Aruba a acerca lider di partido MAS Holmo Henriquez pa aclara e situacion cu e color di e partido, ya cu den comienso di campana MAS a uza un color blauw scur.

Segun sr. Henriquez: “Ora lider di partido POR Otmar Oduber a cuminsa campaña e tambe a uza un color blauw scur hopi similar na di nos. Esaki a trece confusion no solamente den area di propiedad intelectual, pero tambe pasobra Electorale Raad mester duna color oficial na cada lista di partido. Den e parti di propiedad intelectual a trata di un caso mas civil, unda cu nos como MAS a registra nos marca y e departamento a para nos tras, pasobra nos a registra esaki prome. Despues di esaki POR a cambia nan color pa ta un tiki mas cla cu nan a scoge originalmente.”

E color aki por crea algun confusion, segun sr. Henriquez ta splica. “Nos partido ta uza un color blauw scur, mientras esun di POR ta uno medio cla awor. Tampoco por lubida riba partido di Booshi UPP cu ta uza un color blauw cla. Den e Kiesverordening a bini un par di cambio unda cu Electorale Raad ta reconoce color blauw scur y blauw cla pa e lista di partido bin riba e stembiljet. Pa e color blauw scur e ora MAS cu POR lo mester tira lot pa determina ken lo haya e color aki asigna.”

Pa evita confusion, e color di e ‘stembiljet’ no ta defini e color di e partido, ya cu ley no ta stipula esaki.

Lider di partido POR Otmar Oduber di su banda a comenta cu: “Nos na e momento aki no ta preocupa tanto pa e color, mirando cu e contenido di nos programa ta primordial pa nos. Aworaki nos ta den proceso pa lansa un programa di partido e proximo simannan y dianan.  Pa lo ke ta trata e color, nos color nunca a cambia. E color di nos partidonan ta mara na nos statutonan. Nos a compronde cu ta bay tin 2 color blauw, uno scur y uno cla. Si tin mas partido cu mesun color ley ta stipula cu mester tira lot pa determina cua lo keda cu e color. Nos lo mester cana e proceso aki e ora.”