MAS ta cla pa e reto nobo y su lider nobo Marisol Lopez Tromp ta satisfecho y orguyoso pa por a entrega lista di MAS y siete candidatonan. Ayera Lopez Tromp a rechasa e argumento cu el a cambia di varios partido ta motibo pakico e no ta politico stabiel.
Al contrario, ta pasobra el a para semper contra actonan coruptivo y tambe pa locual ta bon pa Aruba, cu MEP a sak’e di partido y e mes a dicidi pa bandona AVP. E situacion cu POR a culmina despues cu como Minister, el a expone casonan di corupcion cu el a topa cune. Y en bes cu a sostene, su coleganan Minister, incluso Prome Minister y Parlamento a actua contra ley pa core cune. “Un di e motibonan pakico tin deterioro den e pais aki ta pa motibo di corupcion den aparato publico. Y ta esey mi a purba drecha. Pa e motibo ey a baha mi, den un procedura contra ley, cu sosten di fraccionnan den Parlamento, sosteni pa tur Minister cu awor ta demisionario.” Riba dje, el a mustra cu bou hala di Prome Minister Demisionario Evelyn Wever Croes a lanta otro parha acusa di comete corupcion, cu den su concepto, ta haci e ponencia di integridad di Gabinete Wever Croes den duda.
Lopez Tromp a bisa cu el a pasa hopi tempo ta refleha pero hopi hende tabata acerk’e pa bolbe den politica, pa e no duna su mes por venci y asina el a acerca e organisacion politico MAS pa tuma e partido.
Mirando cu ta apenas dos siman MAS a haya pa forma un lista, Lopez Tromp ta contento cu a logra un lista di siete persona hopi califica. E candidatonan ta Aquannette Gunn, Bartholomeun Koster, Solangel Dinmohamed Lacle, Alberto Groeneveld, Michel Mungra y Giovanni Lew-Jen-Tai. Un lista politico por tin luga pa 29 persona, pero “ami no ta kere den cantidad, sino calidad. Particularmente despues di a pasa den varios partido. Riba un lista politico mester di personanan cu ta capaz y dispuesto pa enfrenta e retonan.” Y esakinan ta hopi, cuminza cu e situacion di pandemia, pero tambe e palabracionnan haci cu Hulanda, COHO, e landspakket. “No ta facil, Nos di MAS a scoge pa bin cu un team chikito y solido, consisti di hendenan cu ta dispuesto pa saca nan nek, tuma risico pa nan pais.” No tin un programa di partido completa ainda pero Marisol Lopez Tromp ya no ta kere den programa di partido, pasobra den su 23 aña di experiencia ta mustra esakinan ta mas bien bunita palabra, pero cu nunca nan ta bira realidad. Ta e situacion ta determina e pasonan cu mester tuma. “Mi no ta kere den programa di partido ni sprookjes. Pasobra no tin placa.”
MAS a firma un protocol cu e persona cu mas voto lo drenta Parlamento den caso cu mester logra asiento. Awor ta pendiente pa ricibi e 587 firmanan pa por participa na eleccion. Y den concepto di lider di MAS, ta pueblo lo dicidi riba e coalicion. Esnan cu vota tin e decision den nan man ken nan kier den gobernacion. “Y esnan cu kier e mesun cos, lo vota pa partidonan tradicional,” Marisol Lopez Tromp a conclui.
