Den un reaccion por escrito, e lider di fraccion di partido MEP a reacciona riba contenido di e carta cu CAft a manda ayera pa ministro encarga cu Finanzas, pa pone e mandatario na altura di nan decision di no bin Aruba mas pa continua trabao. Den lo subsiguiente e reaccion di Tjon.

Awor e colornan real di CAft ta sali
Cu asombro nos a tuma nota di un carta cu CAft, sr. Gradus, a dirigi na Gobierno di Aruba. Den e carta aki nan ta señala di no lo reuni cu gobierno fin di luna pa e motibo cu e amienda di Parlamento a cambia e posicion di CAft fundamental.

Trabao di CAft
E trabounan cu CAft mester haci ta brinda conseho pa Aruba por yega na finanzas solido. Esaki por wak bek entre otro den e presentacion cu CAft mes a duna entre otro na Universidad di Aruba. E cambionan haci a traves di e amienda no a cambia nada na e funcionamento y/ of e tareanan di CAFT.

Pa loke ta nos ratingnan internacional, manera CAft mes a duna di conoce, tin 2 aspecto cu ta hunga un rol importante, cual ta; cu nos ta forma parti di Reino Hulandes (den cual nada no a cambia) y gobierno mester tin e “commitment” (compromiso) pa atende e situacion financiero (den cual nada no a cambia).

Aspecto constitucional
Ta parce cu CAft tampoco no kier compronde cu na momento cu pais Aruba, den e caso aki Parlamento di Aruba, como pais autonomo aproba un ley nacional, esaki no mester pasa Gobierno di Reino mas. Es decir e parti aki den nan carta cu nan a dirigi na gobierno no ta cuadra cu nos constitucion y ta funciona solamente pa crea inkietud innecesario.

For di 2018 no tabatin un ley vigente y CAft tabata duna nan consehonan a base di un protocol cu tabatin aspectonan di maneho stipula. Den esaki nada no a cambia. A base di e mesun palabracion di maneho nan ta keda conseha. Aworaki nan lo haci’e na Parlamento di Aruba. Pasobra den un estado di derecho (rechtsstaat) ta e representantenan di pueblo cu a wordo eligi pa medio di eleccion liber mester eherce e tarea di control. Nos ta spera cu CAft lo sa di respeta nos constitucion.

Pa conclui, nos ta spera cu CAft asumi nan responsabilidad y brinda nan consehonan na Gobierno y Parlamento. Como organo independiente ta importante pa nan no wordo influencia door di Hulanda aworaki. Si di berdad nan tin interes di pais Aruba na pecho nan no tin motibo valido pa no duna nan consehonan. Of ta un organo politico CAft a bira despues cu Gabinete Wever-Croes a asumi responsabilidad?