Tin varios punto di preocupacion cu ta sigui biba den comunidad, lider di fraccion di AVP, sr Marlon Sneek a mustra durante conferencia di prensa, caminda un di e preocupacionnan grandi cu tin actualmente, ta di e trahadonan di aeropueto cu ainda no sa kico futuro tin pa nan.
Señor Sneek a mustra cu mas di un luna pasa, fraccion di AVP a pidi un reunion publico cu Minister Dangui Oduber pa asina por a scucha for di e propio Minister, den Parlamento caminda e no por gaña, ya cu constantemente durante conferencianan di prensa, ta purba laba man di henter e situacion cu tin.
Minister Dangui a bisa prensa na varios ocasion cu su persona no ta di acuerdo, cu e ta contra di e retironan cu a wordo anuncia pa Triple A, entre otro bisando cu gobierno a manda un carta.
Fraccion di AVP a pidi un copia di e carta aki cu Dangui a manda pa board y Triple A pero te dia di awe ningun hende a haya e carta aki pa mira.
Nos fraccion a pidi un reunion publico na Presidente di Parlamento, pa motibo cu pa partido AVP ta importante pa trahadonan di Triple A, sa na unda nan ta para cu seguridad di trabou.
Por a scucha Minister Dangui Oduber tambe bisa na prensa cu e no ta di acuerdo cu e reorganisacion pero informacionnan cu fraccion di AVP tin, ta mustra cu e board cu Minister Dangui ta nombra, a duna ordo pa sigui cu e reorganisacion.
Awe por scucha sindicato papia di un pakete, nos mes ta haya un cantidad di mail tur dia di trahadonan preocupa di Triple A, kendenan ta manda bisa cu negociacionnan ta sigui pa bula cabes di trahadonan ya cu cincuenta trahado tin cu bay cas y pa partido AVP esaki ta inaceptabel.
Sigur un compania cu a haci uso di ‘loonsubsidie’ pues no a for su presupuesto of saco e ta pagando e trahadonan, el a haya subsidio pa paga trahadonan anto awor kier manda trahadonan cas pasobra e no tin suficiente entrada caminda pa colmo Triple A ta un di e poco companianan cu a cuminsa draai, pa motibo cu frontera a habri, tin areoliñanan ta yegando Aruba, pues tin entradanan ta drentando.
Pero por mira cu ta keda insisti cu kier manda trahadonan cas, caminda Minister Oduber ta bisa prensa cu esaki no ta berdad pero por mira cu e hechonan ta otro.
Ta di lamenta cu te dia di awe, Presidente di Parlamento no kier yama e reunion publico pa Minister Dangui Oduber bin Parlamento y duna cuenta pa e trahadonan aki por sa na unda nan ta para.
Ta imposibel pa un compania cu tur aña ta duna entre 18 pa 20 miyon florin na ganashi, un compania cu ta draai 180 miyon florin pa aña, un compania cu a caba di haci un prestamo di 500 miyon ta bira bisa awe cu e no tin placa.
Anto e ora tin cu splica ta con e ta bay paga e prestamo aki cu el a haci, e proyecto aki ta sigui? Sigur mirando cu e compania mes ta proyectando cu ta aki cinco aña e lo yega bek na 90% dio 2019. Pues splica pueblo si e inversion aki ta sigui, pues laga nos ta sincero cu otro, laga nos ta sincero cu e trahadonan y bisa nan kico ta spera nan.
No keda hunga e wega cu nada ta pasando caminda por mira cu negociacionnan ta tumando luga keto bay y te ainda tin buta riba mesa, manera e dicho ta bisa ‘op de hoogste plank’ ta ser bisa cu 50 trahado tin cu bay cas.
Riba dje ningun hende sa kende nan ta pa motibo cu ta den un tombola a bay hinca nomber y despues saca nomber pa loco.
Esaki ta inaceptabel, ya cu ta hendenan cu awe tin un hipoteca, un car loan, un personal loan pa paga y nan trabou ta na peliger.
Un gobierno cu a bisa cu e ser humano ta central, un gobierno cu a bisa cu ningun hende ta bay cas, un compania cu nos ta sigui ripiti, cu ta hayando loonsubsidie, pakico mester manda e hendenan aki cas?
Pa e motibonan aki Minister Dangui Oduber mester bin Parlamento pa duna cuenta y AVP ta lamenta cu te dia di awe, Presidente di Parlamento no kier yama e reunion aki, ya cu ta mas di un luna pasa cu a yama e reunion aki y por mira cu ta scondemento tin, pasobra ta bay bula cabes di trahadonan.
Minister y gobierno ta keda gaña den prensa cu no ta berdad, cu no ta bay kita ningun hende, cu nan no ta di acuerdo pero pueblo lo bay mira cu tog ta bay tin hende cu ta bay perde nan trabou.
Pa AVP esaki ta di lamenta ya cu Minister Oduber mester ta mas sincero pa e trahadonan aki por prepara nan mes pa sa kico ta spera nan pa futuro pero ta prefera di sconde, ta keda hunga wega y nos por mira cu hopi accion mas ta sigui bin, entre otro esunnan di auto di huur.
Dos siman pasa nos a bisa cu ora mira cu den e grupo cu a bay boluntariamente, cu ta mas o menos 27 trahado, ya ta mas di 10% di personal a bay cas, pues pakico Minister y gobierno ta keda insisti pa manda mas trahado cas?
Trece un bon businessplan, bin parlamento bin hustifica loke ta tumando luga pero AVP ta keda para ariba cu esaki y nos lo bolbe manda un carta, recordando Presidente di Parlamento cu fraccion di AVP a pidi un reunion publico y cu nos ta spera cu di berdad e reunion publico aki lo wordo yama pa trahadonan y henter pueblo haya claridad riba e tema serio aki,” lider di fraccion di AVP, Marlon Sneek a declara.
