Lider di fraccion Marlon Sneek (AVP): Minister tin cu entrega keho contra comerciante pa soborno

Partido AVP a duna gobierno tur espacio pa atende cu e crisis nacional y muncial relaciona cu corona virus, sperando cu gobierno lo sirbi interes di pueblo manera mester ta pero simplemente pueblo no por confia riba gabinete Wever Croes.

Lider di fraccion di AVP, sr Marlon Sneek diabierna ultimo a mustra c’un biaha mas e gobierno di MEPPORRED, no ta un gobierno di pueblo pero un gobierno pa amigo y famia, pa sponsor y sostenedonan di e partido.

“For di diamars siman pasa nos a anuncia cu AVP lo sigui denuncia desaroyonan cu a bin ta tumando luga, caminda gabinete Wever Croes na luga di yuda pueblo den e tempo dificil aki, a opta pa yuda nan hendenan, nan amigo- y famianan, lagando miles di tata y mama di famia den incertidumbre sin solucion pa nan problema.

Ya caba nos a menciona siman pasa riba un publicacion riba e website di BoInformado, caminda ta haci mencion cu un comerciante a trata di cumpra dos gobernante pero cu e ministernan no a cay den e wega aki.

E cos aki no ta aceptabel y si e informacion aki ta berdad, e ministernan mester bay duna un keho contra di e comerciante aki y esey ta loke nos a trece na conocemento di pueblo diamar siman pasa, mientras cu ainda nos no a papia di e asunto di siguro pa turistanan.

Pero kico e minister a haci, ta di trata di bin sconde tras di sr Sneek pero e cos aki no ta traha asina ya cu e minister ta eynan pa traha pa pueblo y nos ta traha pa y cu pueblo, sigur ora cu pueblo mas ta manda informacion pa nos riba loke gobierno ta haciendo.

Henter e proceso di testmento na aeropuerto, tin un nubia scur riba dje y despues cu mi persona a denuncia e asunto aki den conferencia di prensa diamars, minister a bay rueda di prensa diaranson pero no a papia mes riba e testmento aki.

Fraccion di AVP a bisa e Minister cu e tin cu bay entrega un keho y si ta berdad cu tin un comerciante manera e publicacion ta bisa cu un comerciante kier a cumpra dos minister, e minister mester bay entrega un keho y no haci mescos cu nada a pasa.

Si e no haci esaki e minister lo pone cu nos ta bay entrega un keho contra su persona ya cu e ora ta su persona ta esun cu kier a soborna hende.

Ta bon pa nos bisa Minister cu e asunto aki ta den su man, bon gobernacion y transparencia manera gobierno ta bende tur dia na pueblo, pa bay entrega keho contra e comciante kende supuestamente kier a cumpra bo manera cu bo a duna bo a duna e website cu nos a menciona,” Parlamentario Marlopn Sneek a señala.