“Despues cu nos Minister di Finanzas, mr. Xiomara Maduro a dirigi tanto insulto den direccion di lider di fraccion di MAS, drs. Marisol Tromp djis pasobra parlamentario Marisol ta haciendo su trabao como miembro di Parlamento di Aruba, porfin Minister Maduro a admiti den prensa loke ex-Secretario di Estado Van Huffelen a indica net prome cu el a baha, y tambe loke parlamentario Marisol Tromp tin varios luna ta bisa: e maneho financiero di Minister Maduro ta zwak. Pues beter laat dan nooit!”
Esaki tabata palabranan di parlamentario di MAS, Marisol Tromp, den un comunicado di prensa weekend ultimo. El a continua bisando cu como Minister di Finanzas pa shete (7) aña largo el a logra di entrega solamente dos (2) cuenta anual di Pais Aruba (jaarrekening), esunnan di 2017 y 2018. E hecho aki ta mina e derecho di Parlamento pa haci su trabao di control (na tempo) y pues wak unda berdaderamente tur e placa a bay. Importante ta, cu e jaarrekening di Pais so por confirma e suma di e famoso ‘surplus’ oficialmente.
Den su ultimo video cual el a manda prensa, e minister a indica cu tur kwartaal por haya riba e website di gobierno, e asina yama ‘uitvoeringsrapportage’. Esaki ta un documento financiero ‘politico’ cu mester wordo entrega na CAft seis (6) siman despues di e final di cada kwartaal. Ademas e documento aki no ta pasa door di e control necesario, manera ta e caso cu un jaarrekening.
E problema ta cu e uitvoeringsrapportage hopi biaha ta laat y e asina yama ‘wettelijke deadline’ pa entrega cada uitvoeringsrapportage a wordo viola den 2023 y 2024 enormemente. Aki ta papia di un retraso di entre 2 pa 4 luna laat cada bes, cual ta reduci e habilidad di Parlamento pa controla gobierno na tempo. Esaki segun carta di CAft dirigi na gobierno dia 10 di juni 2024.
Pues por conclui cu Minister Xiomara Maduro asina ta confirma cu su maneho financiero ta zwak debi na su falta di accionnan necesario y incumplimento di su promesanan pa fortifica su departamentonan, segun e comunicado di Tromp.
