Lider di fraccion di AVP, MR. Mike Eman: Ta inhusto cu gobierno kier cobra impuesto y prima riba fase

Cu sorpresa e lider di fraccion di AVP, mr. Mike Eman a tuma nota di un reciente declaracion den medionan di comunicacion di parti di departamento di impuesto cu esunnan cu a ricibi FASE lo mester paga impuesto y prima riba e suma cu nan a ricibi.

Mr. Mike Eman ta haci pregunta na Minister di Finanzas Xiomara Ruiz Maduro y Minister di Asuntonan Social, Glembert Croes, riba e anuncio aki. Adelantando riba su preguntanan Eman ta bisa cu e interpretacion aki cu FASE ta un entrada riba cual mester paga impuesto y prima ta hopi preocupante. Especialmente e obligacion di paga prima e ta considera cu lo conduci na un situacion sumamente inhusto pa esunnan envolvi. Un carga cu e no ta kere cu recipiente nan di FASE por carga y tampoco a conta cu ne.

Palo cu alta trata impuesto, si tur cos ta bon, gran mayoria di recipientenan di FASE lo cay den e belastingvrijevoet y no lo mester paga impuesto Eman ta bisa, pero pa locual ta trata prima no tin belasting vrijevoet y departamento di impuesto a bisa infaticamente cu tin obligacion pa paga prima tambe riba e sumanan ricibi a base di FASE.

E sumanan cu recipientenan di FASE lo mester paga na prima lo ta astronomicamente halto y imposibel pa un recipiente di FASE paga, segun e lider di AVP, mr. Mike Eman. Un persona cu no tin werkgever mester paga 26% na prima (15.5% pa AOV y 10.5% pa AZV). Cu e interpretacion di Gabinete Wever-Croes e recipiente di FASE lo mester paga bek na prima Afl. 247,== pa luna y pa un aña di FASE esaki ta suma na Afl. 2964,==.

E lider di fraccion di AVP mr. Mike Eman ta bisa cu esaki ta imposibel pa recipientenan di FASE por cumpli cu ne. Ta trata di personanan cu no tabatatin ningun entrada y sigur lo mester a utilisa tur e suma di FASE pa a sobrevivi. Ta unda nan lo por saca Afl. 2964,== awor pa duna gobierno bek pa paga 26% na prima? E ta totalmente inhusto y irealistico pa pensa cu por bay cobra e sumanan aki di recipientenan di FASE. Segun e lider di fraccion di AVP mr. Mike Eman FASE mester wordo considera manera bijstand riba cual recipientenan no ta paga impuesto of prima. Fraccion di AVP mr. Mike Eman ta bisa pa Gabinete Wever Croes cambia nan interpretacion riba e obligacion di paga impuesto y prima riba e sumanan ricibi a base di asistencia financiero FASE. E ta totalmente inhusto y irealistico.