Diahuebs anochi a tuma luga un manifestacion impactante dilanti di edificio di John Wesley College (JWC), unda lidernan spiritual, christian, maestronan, ex-alumnonan y parlamentarionan a uni nan forsa cu un masa di hende cu tabata tene bela den nan man pa resa y lucha pa conservacion di e institucion historico aki. Mas tempran den e dia, lider di oposicion, mr. Mike Eman, a presenta un nota den nomber di fraccion di AVP dirigi na Minister di Enseñansa. Den e nota aki tin dies proposicion alternativo pa evita e ceramento di e scol. Anochi, Eman a splica e nota, cu un ruta alternativo pa conservacion di e scol, na e masa. E perspectiva aki a ricibi aprobacion grandi di e presentenan. JWC ta existi for di 1955 y ta un scol cu un historia importante den enseñansa christian na Aruba.

Den e nota, titula “The Case for John Wesley College”, e fraccion di AVP ta boga pa conservacion di JWC y ta pidi gobierno pa reconsidera e decision pa cera e scol. E plan di dies punto den e nota ta trata diferente aspecto y ta presenta argumentonan convincente pa enfatisa e balor y potencial di JWC. Lider di oposicion y su fraccion ta kere cu e desafionan cu JWC ta enfrenta por wordo transforma den oportunidadnan pa innovacion y crecemento.

“Enseñansa ta e fundeshi pa un comunidad florece y ta forma futuro di individuonan y comunidadnan,” e democrata christian, mr. Mike Eman a expresa. “John Wesley College tin un herencia rico di excelencia academico y balornan christian, y e conservacion di dje ta di importancia crucial pa comunidad di San Nicolas y pa enseñansa na Aruba den su totalidad.”

E nota ta enfatisa e importancia di JWC komo un guia di conocemento, balornan moral y excelencia den enseñansa. E ta boga pa clasnan mas chikito, ta puntra atencion pa e efecto desmotivante di cera scol y ta enfatisa e necesidad di un dialogo inclusivo cu tur partidonan involvi. Fraccion di AVP ta kere cu conservacion di JWC no ta nifica solamente garantisa un edificio fisico, sino tambe ta forma futuro di enseñansa na Aruba y comunidad di San Nicolas.

Un di e puntonan importante den e nota ta enfatisa e posibilidad di transforma desafionan den oportunidadnan pa innovacion. E caida den inscripcion di alumnonan pa John Wesley College (JWC) ta wordo reconoci como un desafio comparti cu institutonan di enseñansa den mundo. En bes di mira esaki como un obstaculo insuperabel, e nota ta enfatisa cu JWC por capitalisa riba e desafio aki como un oportunidad pa innovacion y crecemento, den colaboracion cu comunidad.

E nota ta mustra cu JWC por bira un modelo pa trata creativamente y positivamente cu desafionan manera esaki. Pa medio di accepta innovacion, JWC por desaroya idea nobo y strategianan pa garantisa enseñansa di calidad y adapta na e cambio den necesidadnan di studiantenan. Den e nota di fraccion di AVP ta menciona ehempelnan exitoso for di otro paisnan caminda scolnan a trata caida den inscripcion cu desaroyo di ideanan nobo.

Pa medio di aliña esfuersonan aki cu “Sustainable Development Goal” #4, cu ta enfatisa enseñansa di calidad pa tur hende, JWC por desaroya como un pionero den inovacion den enseñansa na Aruba. E enfoke aki no solamente ta stimula sostenibilidad di e institucion, pero tambe ta contribui na desaroyo amplio di un comunidad bon educa y activamente inclusivo.

E nota ta sugeri pa salba JWC pa busca partnernan cu empresanan local, introduci programanan specialisa cu ta adapta na area di carera emergente. JWC por bira un ehempel di adaptacion y resiliencia, mientras ta brinda enseñansa di calidad cu ta prepara studiantenan pa e cambio di necesidadnan den futuro.

Den su conclusion, mr. Mike Eman ta cita palabranan di John Wesley: “Hasi tur cos bon cu bo por, cu tur medionan cu bo por haya, den tur manera cu bo por, na tur luga cu bo por, na tur momento cu bo por, pa tur hende cu bo por, con largo cu bo por.” E ta yama gobierno di Aruba pa reconoce e impacto profundo di JWC y no accepta e ciere como un hecho inevitabel, pero como un oportunidad pa innova henter enseñansa na Aruba.