Den e dianan aki e lider di fraccion di AVP, mr. Mike Eman y un delegacion di e partido y di institutonan cientifico cu ta asesora e partido ta sosteniendo momentonan di reflexion profundo cu gremionan y institutonan den nos comunidad. E tema central den e encuentronan aki, mr. Mike Eman ta splica, ta cu mester delinea un caminda pa Aruba pa realisa un reconexion di economia, gobernacion, politica y nos sociedad cu e bon comun (‘the common good’). Eman ta splica cu e vision aki ta bay na e curason di locual ta haci nos humano y ta condicionnan necesario pa trece felicidad bek pa nos comunidad.

Un faro bandona

Awor nos a para bira manera riba un barco den un lama devastador buscando un luz di un faro cu a wordo bandona. Nos balornan comun ta manera un faro bandona, cu ta laga comunidad sin guia den scuridad. De nos mundo occidental y profundamente na Aruba a surgi un desconexion, un distanciamento di e fundamentonan riba cual un sociedad humano feliz mester ta basa. Nos modelonan economico a distancia na mes di e bon comun, enfasis ta wordo poni riba cifranan cu no ta refleha e realidad berdadero den comunidad. Blinda pa esaki ta ignora e berdadero necesidad cu tin den nos sociedad, Eman ta bisa.

Un raiz malnutri

E matanan di nos tempo ta biniendo abou pa falta di tin raiznan sano fuerte pa tene nan firme den e suelonan di nos Pais. Nos tin cu reconoce cu crecemento economico abstrai di un parti grandi pueblo y medidanan feroz a malnutri raiznan di kico tabata e troncon di nos sociedad. Ya mas no tin un mata cu ta florece y ta trece oportunidad husto pa un y tur. Un economia mester ta diseña pa mehora e bienestar di tur ciudadano, no unicamente di algun. Esey kiermen crea cuponan di trabao cu salarionan husto, garantisa acceso na servicionan esencial, manera salud, educacion, y reduci e desigualdad den comunidad.

E luz di guia y un troncon pa sociedad

Bon Comun – Common Good

Nos mester di un cambio de paradigma; un reconexion cu e ‘common good’. Un cambio di un enfoke cu na e momentonan aki ta rondona riba e ‘mi’ y e ‘privilegiadonan’ en bes di ta enfoca riba e ‘nos’ cu ta enfoca riba e bon comun.

Eman ta bisa cu “politica mester tin como obhetivo crea standardnan social y ambiental cu ta respeta comunidad y nos planeta. Nos sistema di gobernacion mester wordo reconecta na nos comunidad, na pueblo, na tur gremio, den dialogonan social, den plataformanan manera “town hall” meetings y encuentronan regular canando den bario, manera antes, caminda ta scucha pueblo y traha pa e bon comun.

Den e encuentronan aki cu gremionan y institutonan, mr. Mike Eman, ta enfatisa nos no unicamente kier rediseña sistemanan y modelonan economico y politico, sino tambe redescubri un causa comun pa sirbi e bon comun. E ta un yamada pa restaura nos inspiracion y nificacion pa revitalisa e alma di nos sociedad. “Nos ta aspira un salida di solo pa un dia nobo cu lo restaura e conexion cu e bon comun; un amanecer yen di promesa y posibilidadnan nobo”.