Locual nos ta tende, mira y sinti for di clamornan cu ta sali for di hogarnan y for di riba caya ta yena mi curason cu hopi dolor, e lider di oposicion mr. Mike Eman a expresa, despues di a hiba combersacion durante fin di siman cu un cantidad di famianan den hogarnan den dolor y ambulantenan buscando un dak riba nan cabes.

Despues di añanan di tanto medida, cortamento di salario, indexering freeze y aumento dramatico di costo di bida y falta di un vision y empeño social-economico nos ta mira e consecuencia penosamente visibel den hogarnan y riba nos cayanan, Eman ta expresa cu hopi lamento. E ta mustra cu e cifranan di institutonan oficial, SVB, CBS y Banco Central, ta confirma e decadencia social-economico aki.

Pobresa den hogarnan

Den hogarnan mi ta tende famianan ta pidi auxilio y ta expresa cu “nan cartera ta yora”. E situacion a bira alarmante y Pueblo no por mas, e lider di oposicion mr. Mike Eman ta accentua. Eman ta teme otro pakete di medida cu gobierno ta bay pone lo caba di pone un parti hopi grandi di nos pueblo den un pobresa ainda mas alarmante y sofocante. Eman ta cita cifranan concreto y mas recien di institutonan di Aruba.

P’esey durante nos gobernacion nos a percura pa aumenta bijstand, introduci reparatietoeslag, schoolkindrentoeslag, aumento di pensioen tambe cu reparatietoeslag. Nos a percura pa ambtenaarnan tambe keda cu forsa di compra cu indexering, inhaalmanouvre y voorjaar- y najaarspremie. Asina nan tambe por ta parti di e vangnet den nan famia pa esnan di menos entrada.

Auxilio for di caya

Mi a combersa cu dos ruman morocho di apenas 20 aña di edad cu ta riba caya sin un dak riba nan cabez. Nos a introduci Sociale Vormingstraject (SVT) pa yuda hobennan asina haya nan caminda bek pa un futuro sigur. E lider di fraccion di AVP, mr. Mike Eman ta bisa cu mester atende cu e retonan aki cu curason y un consenshi. Na e momentonan aki ta kibra so ta kibra tur “vangnet social” cu nos gobierno a crea pa nos pueblo tin asistencia social y cuido medico husto. Pa nos hobennan por bay scol y nan famia tin un entrada pa por provee lo mas basico. Pa tin programanan pa yuda hobennan den dificultad, manera SVT. Kico e gobierno aki ta haciendo ? Nada, pero nada bon, tur cos ta haciendo Aruba mas pober tur dia mas hoben, hasta mucha ta termina riba caya. Nan ta sclama auxilio, pero gobierno ta sordo y mudo pa nan necesidad y dolor.

Den un reciente publicacion di CBS un tabel a keda presenta cu ta mustra cu e deficit di un persona cu salario minimo (Afl. 1815) den comparacion cu e bestaansminimum pa un persona (Afl. 2528) ta crea un deficit mensual di 713 florin.

Segun e cifranan di SVB e deficit aki a practicamente redobla den e 5 añanan di Gabinete Wever Croes. Ora compara e bestaansminimum pa un persona cu cifranan di entrada na Aruba na 2022 por constata cu e maneho di medida di Gabinete Wever Croes a empobrece nos pueblo severamente.

Segun e cifranan di salario por mira cu 25.765 persona tin un salario bao di 3000 florin. Miles no por sobrevivi si nan no traha dos trabao.

Riba esaki ta bin 22.101 pensionado. Esnan cu tin un pensioen di pareha so (Afl. 1948) y nan bestaansminimum pa dos persona segun SVB ta Afl.3792 ta biba cu un deficit di minimalmente 1844 florin pa luna.

Esnan cu ta biba riba un bijstand so cu ta 4000 famia cu un entrada minimal di Afl. 450 te cu maximo di salario minimo Afl. 1948 ta biba continuamente den deficit di entre Afl.2100 pa Afl. 3000 pa luna.

Gabinete Wever Croes ta hincando mas cu mita di Aruba den un pobresa angustioso y sofocante, esaki cu apoyo di e coalicion minoritario MEP/RAIZ.

Restauracion the day after Gabinete Wever-Croes
 Tarea imediato ta pa cuminsa restauracion di poder di compra, combati pobresa y crea perspectiva pa crecemento social economico husto atrobe. E ta Locual AVP a demonstra di por haci caba. Esaki lo ta e caso atrobe y lo ta urgentemente necesario. Saca pueblo di Aruba for di e pobresa cu un bes mas e mesun hendenan aki, cu ta pone interes di nan famia y amigonan dilanti di tur cos, lo ta prioridad number 1.

E lider di AVP mr. Mike Eman ta finalisa bisando cu “the day after Gabinete Wever Croes” nos lo inicia cu e tarea y responsabilidad aki di percura pa un existencia husto pa pueblo den dialogo y harmonia cu tur sector di nos comunidad pa trece bek e Bon Comun como punto di orientacion cu mester trece bek felicidad pa henter nos pueblo. “Nos a mustra den nos propuesto Altenativa 2022 bo por aumenta substancialmente e ayudo financiero pa nos grandinan y esnan di entrada menor”. Fraccion di AVP a cuantifica den su propuesta alternativa con por y mester cambia e rumbo pa pueblo tin un sobrevivencia husto y un perspectiva riba calidad di bida y progreso”. E cambio ta urgente,mr. Mike Eman ta accentua.