Den reunion cu Minister President Evelyne Wever Croes riba presupuesto di DOW nos a puntra atencion pa situacionnan manera esun awor na Serlimar. Nos a bay asina leu pa presenta un mocion pa urgi gobierno pa scucha y sinta na mesa cu esunnan cu preocupacion”, asina e lider di fraccion di AVP, mr. Mike Eman a expresa.
Eman a referi tambe na contratistanan chikito cu contract di servicio cu DOW, SERLIMAR y Santa Rosa cu pa hopi aña ta haciendo un trabao grandi y importante di limpieza y mantencion rond di nos isla; mantencion di e bunitesa di nos flora, barionan y centronan di ciudad y trabaonan adicional pa cual tanto DOW, SERLIMAR y Santa Rosa ta utilisa nan servicio.
Compensacion y condicionnan di trabao na Serlimar pa empleadonan fiho y pa contratistanan chikito ultimamente a conoce cambionan cu a afecta nan den un forma cu a perhudica nan nivel di entrada severamente, nan condicionnan di trabao y tambe nan siguridad di entrada mes. Pa e motibo aki e lider di fraccion di AVP, Mike Eman, a presenta den nomber di su fraccion un mocion cu ta urgi gobierno pa atencion urgente pa e situacion di contratistanan chikito.
Esaki a tuma luga durante di e reunion di Parlamento riba e presupuesto di DOW. Eman a splica den Parlamento cu e Asociacion di Contratistanan Chikito den representacion di e contratistanan chikito, den cartanan, entre otro di fechanan 19 di November 2020 y 28 di Juni 2021, dirigi na Gobierno di Aruba a pidi atencion urgente pa e forma con empleadonan y contratistanan chikito ta wordo perhudica.
E mocion di fraccion di AVP ta bisa cu apesar di e peticionnan aki di e Asociacion di Contratistanan Chikito e decisionnan cu ta perhudica empleadonan y e contratistanan chikito, entre otro cortamento den nan compensacion, dianan di trabao y condicionnan di trabao, ta sigui vigente.
Eman den su declaracion a accentua e trabao duro di empleadonan di Serlimar y e contratistanan chikito cu entradanan margina, cu ta eherciendo trabaonan ehemplar merece un miho trato y un entrada husto y completo.
E mocion di AVP a urgi gobierno pa mas lihe posibel duna atencion na e preocupacionnan y corigi e decisionnan cu ta perhudicando e empleadonan y contratistanan chikito. E mocion di fraccion di AVP a wordo sosteni pa e fraccion di MAS y di ACCION 21, pero e fraccion di MEP y RAIZ a vota contra.
E lider di AVP, Mike Eman, na final di e reunion di Parlamento a bisa cu apesar cu e coalicion no kier sostene e peticion pa gobierno duna atencion na e preocupacionnan di empleadonan y contratistanan chikito Fraccion di AVP lo sigui lucha pa un trata husto pa e contratistanan chikito.
