Aruba ta pasando den problemanan serio. Medidanan cu ta strangula pueblo ta wordo tuma a base diario y awor awa a pasa hariña ya cu bosnan ta lantando den protesta. Tres carta a yega te awor Parlamento unda ta pidi auxilio pa e situacion alarmante cu ta azotando e humilde pueblo.

Un di e cartanan ta bin di Directiva di HOH pidiendo miembronan di e organo mas halto na Aruba pa un ayudo pa loke e unico hospital di Aruba ta pasando aden. Mientras tanto, ABV, bond di trahadornan den cuido tambe a lanta y demostra cu un ora di welga su malcontento cu e situacion reinante. Esaki ta un comienso ABV a laga sa. E miembronan a duna bond e mandato pa bay all out.

Lider di partido di oposicion AVP, Mike Eman hopi preocupa ta splica kico ta pasando y con lo mester atende cu e amargura aki. Eman: HOH ta bisa cu e medidanan cu ta bay wordo tuma pa gobierno y AZV tin consecuencianan dramatico y grave pa e servicio medico cu hospital ta brinda.

Nunca antes na Aruba nos a haya nos mes den un situacion caminda HOH ta anuncia di ta bay corta den servicio medico na pueblo.

Pa motibo di e desaroyonan aki y medidanan di Gabinete Wever Croes hospital tin cu bay haci escogencia cua ta e cuido cu ta wordo duna y cua no. Den e carta HOH ta pone tambe cu lo mester mira cua vacatura lo bay wordo yena y cua no. Parlamentario Mike Eman ta bisa cu Esaki kiermen cu si hospital tin falta di personal, e vacaturanan aki lo no wordo yena sin mas, mescos ta e caso cu waarnemers. Den pasado nos ta corda cu e oncoloog a bay y Aruba a keda sin waarnemer. A reina un disgusto grandi e tempo ey. Esaki ta bay bira e caso cu otro specialismo den futuro,” Eman ta teme.

Eman ta mustra cu den e carta di HOH ta bon cla poni cu e medidanan ta bay afecta empleadonan di hospital tambe. Esaki ta bay bin den e CAO nobo pa loke ta e condicionnan primario y secundario.”Esaki ta nifica cu e personal cu semper bay ta traha duro y sigur e ultimo añanan aki cu durante e pandemia ta bay conoce cortamento den nan condicionnan di trabou y lo bin evaluacion pa loke ta empleadonan cu lo keda den servicio di hospital”. Esaki basicamente ta anuncio di retiro, Eman ta bisa.

E lider di fraccion di AVP, Mike Eman ta continua bisando cu e situacion aki ta uno sumamente grave y ta algo cu tabata planea dor di Gabinete Wever Croes y c unan a trene scondi. Dia 11 di februari un carta di henter e sector medico a yega Parlamento, hopi prome cu e carta aki di 4 di maart unda ta bati alarma riba e medidanan cu gobierno ta bay introduci den cua ta señala cu mester paga pa cada servicio medico. Esaki no ta cosnan cu e pueblo aki por carga. “Ta algo iresponsabel y awe e mesun situacion iresponsabel aki ta yega na porta di nos hospital. Luna pasa henter sector di cuido medico a bati alarma y nada a wordo haci. Awe nos ta sinta cu un situacion alarmante, grave cu por termina den fatalidad. Pesey e fraccion di AVP a solicita un reunión di Parlamento cu e sector di cuido cu te awe no a worde convoca. Tambe parlamentario Mike Eman ta lamenta e retiro di dr. Tim Peterson. Eman ta bisa cu den Paralmento fraccion di AVP a solicita intervencion di Minister pa evita cu lo perde dokter Tromp y Peterson y awe toch nada a wordo haci efectivamente pa evita esaki. Aruba ta perde atrobe jiunan di tera profesional den nan profesion.