Malcontento y un duda grandi di kico ta locual cu ta bay pasa pa e siguiente aña escolar ta algun di e puntonan cu e manifestantenan di awe a trece dilanti na porta di parlamento. Minister Lampe a duna instruccion pa no tuma suficiente alumno pa yena SPO pa asina haya subsidio.
Trahadonan di traimerdia no ta haya informacion y esaki ta di lamenta. Segun lider di fraccion di Partido AVP y docente di profesion Marlon Sneek loke ta pasando cu traimerdia ta inaceptabel.
For di un luna pasa trahadonan di traimerdia ta canando nan caminda y sinta den e reunion cu minister di enseñansa sin haya contesta concreto. Un copia di un carta a keda entrega na algun parlamentario awe cu a bin di parti minister Lampe cu te ainda no a yega cerca e parlamentarionan. Cu esey ta mustra con bruha e minister aki ta traha y ta un di e motibonan cu ta keda para riba cu ta un reunion publico mester pidi pa asina e por bin duna cuenta di kico ta su intencionnan.
Algun siman prome cu vakantie escolar ainda nan no sa kico ta nan futuro, si nan tin trabou of no, trahado di SPO si tin cu presenta na mes un edificio of nan a muda, situacion ta for di lo normal. E minister tin cu bin parlamento y no den comision di enseñansa, den un reunion publico pa tur hende por tende unda e minister ta para y kico ta e direccion cu ta bay tuma. Di importancia y teniendo parlamentario Vrolijk na su palabra, cu ta un solo parlamento tin y cu no por sconde tras cu ta minister di coalicion, sino mas bien tin cu informa kico e ta haciendo.
Den un encuentro parlamentario a pidi plan y vision pero te dia di awe no por haya nada for di e minister, unicamente por a comproba cu e ta traha ad hoc, cu ta inaceptabel. Faltando un siman so mas pa minister tuma decision ta keda e inkietud si acaso agenda di parlamento lo ta druk pa yama un reunion publico. Segun parlamentario Marlon Sneek, esaki mester ta posibel y mas lihe cu ta posibel. Aunke tin reunion di IPKO final di siman ta resta e comienso di siman pa yama esaki pero e prerogativo ta keda den man di e presidente di parlamento.
Prioridad
Tin cu duna cada manifestante e oido y respet. Cu e manifestacion nan a bin expresa nan preocupacion cu ta bibando pa mas di un luna caba. Nan ta merece di haya informacion veridico riba kico realmente ta bay pasa cu nan y cu Enseñansa en general. A tuma nota cu e Minister a kita huiswerkbegeleiding, na momento cu e aña escolar nobo drenta. Ken lo ocupa su mes di esaki? mirando cu no a kita huiswerk for di enseñansa, a kita esunnan cu ta duna training y guia na e lidernan di grupo cu ki meta y sin consulta cu esunnan den veld.
E minister ta hustifica su mes por medio di bisa cu mester hunta organisacionnan di enseñansa special, mirando cu nan no ta yena ni 100 mucha y cu esey no lo ricibi subsidio, cual no ta berdad. Pa contradeci esey por mira ehempel di scol adventista pariba di brug cu ta 38 mucha y ta ricibi subsidio. Den e mesun contradiccionnan aki tin e instruccion di e minister pa no manda alumnonan di Emma School, ni di Scol Caquetio, ni Scol Paso pa Futuro, cu ta pasa test pa drenta SPO. Ta prefera mas bien laga nan continua na klas 7, tur esaki deliberadamente pa no yega na e cifra menciona di 100 alumno pa SPO. Parlamentario Marlon Sneek ta considera esaki algo diabolico.
Minister Rudy Lampe tin cu sali afo y bisa kico ta su maneho y punto.
Stop di sconde tras di triki y hinca enseñansa den problema, cual ta condenabel den otro paisnan caminda indiscutiblemente ta e futuro. Ta kibra e oportunidad di cada studiante y existencia di bo pais pasobra ta enseñansa ta e base fundamental. E minister aki no tin structura y e tin tur hende man na cabes, ta locual cu Marlon Sneek a bisa na final.
