Dos dia despues di su detencion pa agentenan federal,Mariano de Jesus, ‘Pata de Queso’, un di e lidernan di e cartel di Los Zetas na estado Tamaulipas, a fayece na un hospital, asina autoridadnan a informa na prensa.
Martiniano, di 56 aña di edad, a keda deteni dia 14 di november den un hospital na Tamaulipas, acusa di a coordina un masacre na 2010 cu a costa bida na 72 migrante na municipio San Fernando di mesun estado. Despues di e detencion su estado di salud a empeor, y a bolbe hib’e hospital.
“Despues di e detencion el a cuminsa mustra sintoma di un pancreatitis agudo y a traslada e persona pa un hospital. Aya el a fayece dia 16 di november, segun un fuente di gobierno Mexicano a confirma.
E asina yama masacre di San Fernando ta un caso ainda sin resolucion. E investigacionnan ta indica cu e 72 migrantenan a ser secuestra pa Los Zetas, pero ningun hende a paga e rescate. Posteriormente, e narcotraficantenan lo a exigi di nan pa join nan cartel, pero como cu nan a nenga, nan a mata nan.
Procuraduria General di Republica (fiscalia federal) a informa den un boletin cu Martiniano lo a enfrenta acusacion pa varios desaparicion y secuestro, entre nan di un ciudadano Mericano.
Tambe tabata acus’e di responsabilidad den e asesinato di e activista Miriam Elizabeth Rodriguez Martinez, cu a logra cu a aresta varios miembro di Los Zetas responsable pa e desaparicion y morto di su yiu.
Na inicio di 2017 y despues di cu 29 preso a huy di e prizon di Tamaulipas, Elizabeth Rodríguez a cuminsa haya menasa di morto. Dia 10 di mei, dia di Mama na Mexico, un grupo arma a caba cu su bida.
