Durante e reunion di comision financiero-economico di Parlamento di Aruba cu gremionan comercial diabierna ultimo, a keda confirma cu e BBO na frontera ta bay ta devastador pa Aruba. Lider di Fraccion di AVP, mr. Mike Eman ta mustra cu tur e argumentonan cu a keda presenta a confirma e ponencia di nos fraccion cu e ley di 7% BBO na frontera ta devastador pa Pueblo y Pais. Pesey e lider di oposicion, mr. Mike Eman ta urgi Gabinete Wever-Croes pa para e ley y busca otro rumbo ya cu nos pueblo NO por carga mas medida.
Durante e encuentro e gremionan a mustra cu costo di bida ta bay aumenta dramaticamente. A pesar cu gobierno ta purba convence cu e efecto lo ta minimo, prijs lo subi pasobra den hopi caso e comerciante no tin otro opcion. Sea cu e no ta bin na remarca pa haya e 7% bek, of e tin cu hinca e 7% den e prijs door di e inseguridad y tardansa cu restitucion di parti di DIMP, of pasobra e tin cu financia e placa cu ta duna na gobierno di forma adelanta.
Den mundo di turismo tin hopi preocupacion tambe pa e impacto cu esaki ta bay tin, segun Eman. Specificamente pa loke ta bay ta importacion di mueble y ekipo cu hotel y restaurant mester pa remodela y renoba. Fuera di paga un invoerrechten cu ya caba ta halto, awo lo mester paga e 7% di BBO na frontera, cual no por haya restitucion. Ta pone cu hotel y restaurant ta opta pa no renoba pasobra ta demasiado costoso y asina e producto turistico su calidad ta bay atras; loke a sosode caba den pasado bou di otro gobernacion di MEP caminda a aumenta invoerrechten y subi e costo pa industria turistico.
Fraccion di AVP a reuni tambe cu Aruba Jewelers Association. E cambionan cu ta bin cu e ley aki ta inclui un redoblacion di invoerrechten riba joyas. Segun e Association esaki lo ta funesto pa e comercio di joyeria den cual tin 300 pa 400 mama y tata di famia ta traha. Aruba lo no por competi mas cu otro isla. Y como cu nan prijsnan di benta ta fiha dor di nan supplier nan lo bai perde placa y hopi lo mester sera nan porta.
Eman: “Tabata alentador pa scucha for di e propio sector comercial un sentido di solidaridad y comprension cu costo di bida ta demasiado halto. Maske nan tin cu pas’e den e prijs, nan tambe ta sinti pa e consumidor.”
Tabatin referencia na e hecho cu mester aumenta e reparatietoeslag pa pensionado, esunnan cu salario minimo, pensionado y riba bijstand, manera cu AVP a indica den su presupuesto alternativo aña pasa. Mas aleu, Eman ta kere cu mester ahusta e maximo cu un persona por gana pa haya reparatietoeslag for di 2.500 pa 3.000 florin, “pasobra ora cu el a wordo introduci den nos gobierno ta mas cu dies aña pasa.” Esaki tambe por a sinti comprencion pe serca representantenan di gremionan. “Locual nos a bin ta alerta pe cu practicamente mitar di nos poblacion no por alcansa e “bestaansminimum” tambe a worde confirma pa un experto di cifranan nacional di estadistica den reunion”, mr. Mike Eman a expresa.
Segun e lider di oposicion, practicamente tur gremio a expresa hopi preocupacion y ta confirma loke fraccion di AVP a bin ta bisa hopi luna caba, cu e BBO na frontera ta bay ta devastador. “Nos ta urgi gobierno pa para e ley aki pasobra e lo ta un ley cu consecuencia sumamente grave pa consumidor, pa comercio, pa turismo, pa economia en general y pa Aruba. Aruba no por carg’e, demasiado medida caba, nos tin cu bay otro rumbo.” Nos a prueba den nos Presupuesto Alternativa cu tin un otro rumbo, uno cu ta trece alivio, mr. Mike Eman a enfatisa.
