“Ban no laga e decepcion cu e momentonan dificil cu nos ta pasando aden blinda for di nos bista e consciencia cu e ciudadanonan y lidernan di e isla chikito aki, contra mar y mareo, a construi e isla cu mayor desaroyo social economico den e region aki; cu e infrastructura di mas moderno y prepara pa carga nos desaroyo y habri porta pa mas oportunidad y progreso.

Nos sistema di educacion, nos seguro medico general, nos reda social, nos diferente modelonan di pensioen y sosten pa esnan mas vulnerabel den nos comunidad ta haci Aruba excepcional den e hemisferio aki. Nada a bin regala. Nada a simplemente cay den nos brasanan. Den transcurso di nos historia nos hendenan a pensa cu sabiduria, a traha duro, a lucha incansablemente pa Aruba por a alcansa bienestar pa su Pueblo”, esaki tabata sentimentonan cu mr. Mike Eman a comparti cu hopi elocuencia den su mensahe nacional pa Aña Nobo.

 

Eman a enfatisa cu en berdad na e momentonan aki nos tin retonan hopi grandi. Y cu hustamente na e momentonan aki nos no ta desplegando e mihor calidadnan di capacidad, di vision y liderazgo pa atende cu e desafionan urgente y emergente cu ta menasa di hiba nos hopi aña atras, hopi aña atras den nos logronan constitucional, estatal y socio economico. E a mustra riba un reciente rapport di Banco Central, Financial Wellbeing of Households, cu ta relata e preocupacion encuesta cerca nos ciudadanonan; 75% ta raporta den e Financial Wellbeing of Households di Banco Central cu nan a sufri perdida di entrada.

Eman ta bisa cu ora bo analisa e daño acumula aki lo tabata logico pa tende di gobierno cu tin un plan pa crea un impulso economico grandi cu ta enfoca riba e otro pilarnan di nos economia pa por recupera di e sla enorme aki. Nos no ta mira y scucha esey y tampoco Banco Central ta mir’e.

E a cita Banco Central: “Real investment, on the other hand, is expected to record negative growth in 2021, contracting by 19.2 percent, as lower outlays for both private and public investment are foreseen”; “the baseline scenario assumes a further contraction in investment, mostly resulting from the finalization of numerous (large) construction projects in 2020, coupled with the start of relatively few new construction projects in 2021”.

Den un carta reciente di CAFt nan ta raporta cu gobierno ta spera di bay colecta 160 miyon florin for di pueblo cu introduccion di BTW na 2023.

Cu preocupacion e lider di AVP, mr. Mike Eman ta mustra cu tur esaki, e estadisticanan y cifranan, ta bisto den pueblo, den un e amargo realidad di desempleo, perdida di poder di compra y pobresa y un falta total di perspectiva pa futuro.

E problema ta grandi, gigantesco y penoso. Pero nos por cambia e rumbo aki. Nos a yega di hacie na mas di un ocasion. Nos mester recobra e confianza den locual Aruba por. Pero e ta exigi liderazgo humilde, dedica na unicamente sirbi nos Pueblo cu alma, curason y celebro. E motivacion pa sirbi mester ta dirigi riba interes di un y tur y no sirbi algun so. E sentimentonan pa inspira un Pueblo for di un situacion asina grave y urgente no por ta basa riba rabia, odio y envidia. Haciendo esaki a fractura, dividi y polarisa nos Pais manera nunca antes.

 

Eman ta haci un yamada pa un union pa cambio. “Nos mester bay apela riba e sentimentonan di mas profundo di patriotismo den nos Pueblo pa nos por recobra e animo di lucha pa Aruba por supera; “Nos lo mester bay tin e plannan y accionnan mas convinscente cu nunca antes pa inspira inversion atrobe den nos Pais”; “Nos lo mester bay tin un maneho husto di comparti prosperidad, comparti poder di decision cu humildez den dialogo real, comparti visionnan di un Aruba duradero cu proteccion di nos Dushi Tera cu lo inspira cada hoben atrobe pa mira cu na Aruba mes nan futuro ta. E organisacion politico cu ami tin honor di representa, ta cla pa hiba nos pais un biaha mas den e direccion di paz y prosperidad pa tur atrobe”.