Lider di AVP, mr. Mike Eman: BBO redobla ta empeora inflacion importa manera un vergrootglas

Den bishita y reunionnan di bario e lider di fraccion di AVP mr. Mike Eman ta bisa cu e ta haya confirmacion di e pobresa y di e dolor den pueblo. “Costo di bida ta subiendo den un forma alarmante. Ta obvio cu e medidanan cu Gabinete Wever Croes a implementa durante e ultimo anjanan a impacta e cifra di inflacion severamente.

Na 2017 ainda inflacion tabata menos cu 0%, esta – 0.6%. Na 2018 y 2019 esaki a subi drasticamente cu medidadanan di Gabinete Wever Croes. Y awor den 2022 e a yega un record na Aruba. CBS ultimamente ta raporta cu bestaansminimum practicamente pa luna ta subi cu 200 a 300 florin. Entre December 2017 y September 2022 por mira un aumento dramatico manera indica riba e tabelnan aki di CBS.

Redoblacion BBO – Vergrootglas

Redoblacion di BBO na 2018/2019 y e hecho cu e BBO a worde poni tambe riba diferente otro cosnan cu tabata exonera, manera transacionnan bancario y  seguro a crea un efecto inflatorio cu awe nos ta sinti mas cu nunca. Riba gasolin y diesel e impacto tabata dobel, 12%. Tambe e eliminacion di e descuento di 10 cent pa liter di gasolin y diesel tabata tin un efecto negativo grandi”. Tur esaki según e lider di fraccion di AVP, mr. Mike Eman ta haci Gabinete Wever Croes responsabel pa e pobresa alarmante cu tin na Aruba.

Eman ta splica cu na e momentonan aki tin un inflacion halto internacionalmente cu nos ta importa na Aruba. Locual ta haci e inflacion aki bira un monster ta e redoblacion di BBO na 2018//2019. Awe nos ta sinti e efectonan mas cu nunca. Pasobra, e ta splica, cu e inflacion importa ta pasa awor den hopi caso den tres schakel di e BBO cu tabata 3% y cu Gabinete Wever Croes a haci 6%. E impacto final ta riba 18%. Ta mir’e den e aumento dramatico di comestibles na Aruba.

Perdida penoso di poder di compra

E efecto di e perdida di poder di compra ta hopi penoso pa nos hogarnan, Eman ta accentua y ta mustra cu esaki tambe ta afecta e economía en general. Aki tambe e líder di AVP ta cita un parti di un rapport di Banco Central. Eman ta splica cu hopi bez e a mustra riba e hecho cu kibrando e poder di compra cu medidanan e gobierno ta kibra tambe e economía di Aruba.

E ta bisa cu hopi vez institutonan cu ta conseha gobierno riba tema di reducción di déficit no ta mira e corelacion entre poder di compra, economía y entrada di gobierno. Eman ta haye importante pa mira awor den e estudio di Banco Central un afirmación di e importancia di poder di compra y consumo local riba economía. Eman ta cita: “Household consumption is readily recognized as one of the key drivers for economic development. More than half of Aruba’s gross domestic production (GDP) depends on the financial position and wellbeing of the households”.

Aumento di BBO atrobe

Aumento di BBO cu atrobe lo haci e tres schakel un total di 21%. E inflacion importa lo pasa bao di un vergrootglas cu lo aumenta esaki cu minimalmente 21%. Matando e poder di compra manera nos ta mira den e serie di medidanan pa bin ainda lo sigui empobrece Aruba y lo keda debilita un motor principal di nos economía cu ta e consumo di nos hogarnan cu ta depende di nan situación financiero. E hecho cu no tin perspectiva pa mehoracion caba ta crea preocupación y stress mental den nos horagnan, e líder di AVP mr. Mike Eman ta bisa. Esaki tampoco ta yuda recuperación di e factor consumo den nos economía e ta agrega mustrando riba e cifra halto den e estudio di Banco Central cu ta bisa cu nan ta preocupa cu nan finanzas pa e siguiente seis lunanan aki.