Den un carta dirigi na Parlamento di Aruba fecha 11 di februari 2022 mundo di cuido medico a bati alarma pa medidanan di gobierno pa cu cuido medico. E introduccion di un “Eigen Bijdrage” ta wordo considera como un medida hopi negativo pa acceso na cuido medico. Specialmente esnan di menos recurso lo wordo severamente perhudica, e sector medico ta adverti.

Lider di Fraccion di AVP mr. Mike Eman ta bisa cu nan fraccion a tuma e preocupacion aki di henter e sector di cuido sumamente na serio y pa tal motibo a pidi di inmediato un reunion di Parlamento pa scucha e sector di cuido den un Bijeenkomst Publico.

Un panico total ta reinando den e mundo medico na Aruba na e momentonan aki, lider di fraccion di AVP, mr. Mike Eman a trece dilanti. Practicamente henter e sector medico di Aruba, mencionando tur enfermero, tur botica, FMSA, Respaldo, organisacion di dokternan di cas, e instituto medico San Nicolas, organisacion di cuido medico di Aruba, organisacion di specialistanan medico di Aruba, organisacion di laboratorionan priva y organisacion di boticarionan, a dirigi un carta na Parlamento recientemente, mustrando nan preocupacion grandi pa e plannan di gobierno.

Mr. Eman a sigui mustra cu den e carta cu a yega Parlamento diaranson siman pasa, mundo medico ta expresa cu nan tin preocupacionnan grandi y preguntanan na cantidad, specialmente pa e forma cu pashentnan lo wordo afecta cu introduccion di Eigen Bijdrage.

“Pa prome biaha den henter mi carera politico cu mi ta wak un carta asina cu ta bini for di sector medico, caminda e accento no ta pa nan propio interes of pa gastonan cu ta bay subi pa nan of pa entradanan cu nan ta bay perde pero cada punto cu henter e sector medico na Aruba ta alerta p’e den nan carta, ta directamente relata na medidanan cu ta bay afecta pashentnan na Aruba.

Loke ta mas serio di e contenido di e carta cu sector medico a manda pa Parlamento, nan ta pone enfasis cu mientras cu gobierno a anuncia cu pa dia prome di April lo introduci e medidanan den sector medico oficialmente pero ningun momento a reuni of pidi pa conseho di e sector aki.

Den mesun carta cu nos a ricibi na Parlamento, nan ta mustra cu “goed bestuur in tijden van grote verandering, kenmerkt zich onder anderen door het tijdig betrekken van de relevante stakeholders,” pues cu gobernacion drechi lo a acerca tur esnan envolvi, tur esnan stakeholder, prome cu bin c’un cantidad di medida di cual e efectonan dramatico pa cuido medico cu e medidanan aki ta bay tin.

E preocupacion ta hopi grandi cu dor di e medidanan di gobierno, lo bay percura pa un asina yama, “klassezorg.”. Dor cu gobierno ta bay exigi pashentnan pa nan paga pa ora cu nan bay dokter di cas, paga ora cu nan bay specialista, paga ora cu nan tin cu bay botica y laboratorio y tambe paga ora cu nan bay Eerste Hulp, esaki lo haci cu gobierno ta bay haci un distincion na Aruba, cu hustamente AZV desde su entrada na Aruba a elimina.

Mr. Mike Eman ta bisa cu nan carchi di AZV, tur hende na Aruba tabatin mesun acceso na cuido medico sin importa si nan tabatin placa of no tin placa pasobra tur hende ta cay bou di e seguro aki. Cu e medidanan ta solamente esunnan cu tin placa pa paga so tin acceso na cuido medico y esunnan cu no por paga, sea nan no ta bay dokter mas of dia nan dicidi cu nan no por mas y tin cu bay dokter, por ta laat y lo crea ainda mas problema pa e pashentnan aki.

E lider di fraccion di AVP, mr. Mike Eman ta bisa cu e situacion aki ta asina grave y urgente cu nan fraccion a solicita di biaha un reunion cu sector di cuido den un reunion publico caminda nan por expresa nan preocupacion y pueblo lo por sigui esaki.