Lider di AVP, e partido politico mas grandi di Aruba, mr. Mike Eman a dirigi su mes den un discurso nacional na pueblo cu ta pasando den momentonan duro. Un siman di masha discordia social y problema laboral ta tras di lomba unda di tur banda tabatin manifestacion di gruponan den nos comunidad vociferando nan malcontento y desapunto den maneho di actual gobierno. Eman, kende a wordo acerca pa hende di tur color politico a duna oido na nan peticion y a tene un discurso den cual e ta convivi cu comunidad den e turbulencia actual.
Eman a cuminsa su discurso bisando cu den cada momento dificil den nos historia nos a haya contesta y un direccion nobo den contempla cu un curason habri con nos a yega aki y cu cua boluntad, forsa y energia nos lo supera.
“Den cada momento di desapunto, inkietud, incertidumbre y sentimento di abandono tin e oportunidad di e buskeda di contesta y di reeleccion profundo. Tin momento cu den tur humildez, cu rudia na tera y cara na shelo, nos ta puntra nos mes kico den asina corto tempo a ranca for di nos curason e alegria di nos cuna venera. Pa e contestanan ta profundo nos amor prohimo y nos pasion patriotico mester carga nos riba nos pasion partidario, pasobra reduci e situacion actual na un debate politico lo no hiba nos na e conclusion cu ta mas profundo cu un color politico, pasobra e causa no tin color, pero e tin di haber cu hende”.
Eman a bisa cu e instituto gobierno no tin un consenshi di su mes. E no tin un curason di su mes. E no tin capacidad moral y intelectual di su mes. Ta hende ta trece of no trece nan na e luga importante aki cu ta dirigi nos bida y nos destino.
“Esey kiermen cu mi ta haci boso un peticion dificil, pasobra mi ta consciente cu mi mes ta un lider politico, cu un color politico profundo den mi bida, pero mi ta kere cu e momento cu nos ta bibando mester di nos sin prehuicio partidario, pero cu un alma habri los di nos color politico. Pasobra e contesta cu nos ta busca, no mester unicamente carga nos for di e situacion actual, pero mas importante mester bira e cuadra di referencia na cual nos lo midi tur cos den futuro pa evita ripiticion. Nos reflexion mester duna nos normanan duradero, skirbi den nos alma, cu lo pasa di un generacion pa otro, mescos cu e scrituranan riba e tablanan di Moises.”
Eman ta bisa cu no ta normal cu un pais den pleno crecemento economico di 2.3%, den apenas un aña ta cay den recesion sin cu tabatin un evento den su sectornan economico of factornan externo, pero unicamente un cambio di gobernacion den e pais. No ta normal pa bay den un aña di crecemento fuerte pa un recesion penoso. E no ta normal cu un pais cu tabata conoce un inflacion di bou di 1%, den apenas un aña ta experencia un inflacion grave y penoso cu ta empobreciendo nos pueblo, sin cu tabatin un inflacion den exterior of factornan monetario, pero unicamente un cambio di gobernacion. No ta normal pa bay di practicamente cero inflacion pa casi 10% di aumento doloroso di costo di bida den dos aña.
E no ta normal den historia di nos Pais, berde of geel, cu personanan a bay eleccion y bisa pueblo cu nan lo haci of no lo haci y no simplemente keda sin haci, pero haci net lo contrario.
E no ta normal cu nos tin hendenan cu nos pueblo den e forma mas enfatico cu por na 2009 a bisa cu Aruba nunca mas kier mira hendenan sinta den gobierno cu ta haci nada otro cu privilegia nan amigo y familiarnan a costo di bienestar di henter un pais, awe ta haci net esey atrobe.
Den e falta di compromiso y cumplimento cu electorado y orientacion completo riba mantencion di poder e debilidad di gobernacion ta bira ainda mas vulnerabel frente interesnan aheno di partidonan menor.
E no ta normal cu un gobierno ta bisa pueblo cu e ta bay baha deficit y debe y ta aumenta su gastonan cu 100 miyon extra den un aña !
CAft a constata:
“Inmiddels is duidelijk dat het tekort in de Begroting (BW) hoger uitkomt dan de realisatie van 2017, en dat de totale kosten in de Begroting (BW) ten opzichte van de realisatie 2017 met AWG 97,8 miljoen zijn gestegen”.
E momento aki cu mas nos ta sinti e dolor, cu mas nos ta sinti nos mes defrauda ta e momento pa tuma un decision grandi, no di wak berde of geel, pero wak e hende riba e lista, purba sinti su curason, purba mira den su alma. No laga e bandera cu e ta carga ciega bo, pasobra na final ta locual ta biba of no biba den su curason ta bay determina con bo famia, bo bario, bo scol, bo empresa, bo instituto, bo gremio, bo sector, bo fundacion, bo origen y bo mes ta wordo trata.
Comments are closed.