Tin un pobresa creciente den nos comunidad, hopi sufrimento cerca famianan cu mi ta bishita, costo di bida ta birando impagabel pa miles di famia na Aruba. Esaki tabata e reaccion di ex prome minister y Lider di AVP, Mike Eman despues di a bishita Sonia Westerburger na Tarabana Dakota y scucha su clamor.

Sonia Westerburger (83) ta un señora grandi aprecia y respeta na Aruba. E ta un persona cu un fe grandi y ta lesa su bijbel tur dia pa fortifica su creencia y su mision como un bon ser humano riba e mundo aki. Sonia a pasa momentonan hopi dificil cu fayecimento di su yiu stima, Karin Jie- Sam Foek, na un edad hoben na man di e teribel malesa di cancer. Pero cu su fe y stimacion pa su yiunan, famia y amistad e a sigui lucha pa duna bida un contenido digno.

Den su cas humilde na Mamoticastraat por mira tur cos cu ta yena bida di Sonia: su rumannan, un di nan na bishita e momento ey Johannes Westerburger, 5 ainda ta na bida. Potretnan di su famia, mayornan, yiunan y amistad y e lecturanan di su religion cu ta fortifica su proposito den bida, a pesar di tur contratiempo. Su preferencia politico, su speransa pa un miho mañan pa Aruba, tambe ta visibel na su cas cu potretnan y publicacion di Mike Eman y tambe di su antepasadonan. Sonia ta un di nos grandinan cu raiznan profundo den e comunidad Arubano cu awe ta sinti cu gobierno di su pais ta causando e y miles di otro hopi sufrimento.

P’esey Sonia Westerburger a dirigi su mes na esun cu e ta confia y e kere aden den politica pa por proteha esunnan cu mester proteccion, ex prome minister Mike Eman. Sonia a comparti cune su dolor cu e costonan cu e ta wordo confronta cune dor di tur e medidanan di gobierno. E ultimo sorpresa cu Sonia a haya, despues cu casi nada di dje ta resta na man di tur e medidanan, ta e aumento di 6% di BBO riba e seguro di su humilde cas cu e a traha henter su bida pa e por a bira doño di dje. Tur e aumentonan aki ta causando hopi sufrimento cerca Sonia y den Pueblo.

“No haci cu otro locual bo no kier pa nan haci cu bo”, esaki ta e prome cos cu a bin na mi mente despues di a bishita Sonia Westerburger, ex promer minister y Lider di AVP, mr. Mike Eman a expresa. E medidanan di gobierno ta birando un peso insoportabel pa miles den nos comunidad y no tin hustificacion pa nan cu e gastonan cu bo ta mira riba e presupuesto di gobierno. E siman aki a sali publicacion cu ta prueba cu Ministernan ta biahando pa miyones di florin sin un meta y resultado cu ta hustifica e gastonan astronomico aki. Peor e dolor den pueblo ta bira ora mira cuanto famia di e gobernantenan a wordo poni den gobierno, mr. Eman ta enfatisa.

Awor nos ta mira tambe cu na luga cu nos a haya 7 minister manera a priminti en realidad nos tin 14

minister. No menos cu 6 ex Minister ta trahando cu e Gabinete Wever Croes: Nel Oduber, Hendrik Croes, Rudy Croes, Junior Croes, Edisson Briesen y Nilo Swaen. Con por hustifica e peso absurdo riba pueblo cu tanto privilegio pa un grupito ta locual henter Aruba ta puntra su mes awe.

Ex prome minister Mike ta termina bisando cu e ultimo encuesta di Banco Central bao di consumidornan Arubano ta confirma e sentimentonan di dolor, malcontento y pesimismo cu e maneho di Gabinete Wever Croes ta creando. P’esey e ta crucial pa nos uni forsa pa trece un cambio mas rapido posibel cu lo trece alivio pa Pueblo y un perspectiva positivo pa Aruba atrobe.