Pa motibonan cu ningun hende por compronde, Gabinete Wever-Croes pa medio di Minister Lampe, a cuminsa un proceso pa elimina e masha exitoso centro di cuido despues di scol ‘Tra’i Merdia’. E pregunta mesora ta lanta pakico cambia un proyecto cu asina bon resultado.
Esaki ta parce atrobe un otro acto simplemente pa kibra algo grandi y bon cu un gobierno di signatura di AVP a crea mas di 20 anja pasa. Asina e lider di AVP, mr. Mike Eman a expresa cu preocupacion.
Tra’i Merdia a keda funda na 1996 durante Gabinete Henny Eman II, e tempo ey riba iniciativa di Minister Eddy Croes. Un tremendo proyecto cu a demostra su motibo di existencia. Vision di Tra’i Merdia ta pa cuida y duna guia na e muchanan di ciclo basico y di e forma aki contribui na formacion di muchanan feliz y saludabel pa comunidad di Aruba. Centenares di mucha a atende Tra’i Merdia y ta mira bek riba un periodo feliz di nan infancia.
Miles di mucha a atende Tra’i Merdia durante e añanan tras di lomba unda cu nan tabata wordo yuda cu nan huiswerk, tabata hunga, canta. Tabata combina loke tabata necesario y util cu loke tabata creatividad. Hala sin mas un proyecto asina exitoso pone un banda, ta bay ta desastroso pa enseñansa den su totalidad, y hopi negativo pa mayornan.
Cu Gabinete Wever Croes tur su decisionnan ta wordo influencia pa motibonan partidista of otro interesnan cu no ta interes general ta obvio. Elimina algo bon y solido atrobe simplemente pa motibonan partidista ta hopi lamentabel. Tra’i Merdia no a bin di un dia pa otro. Ta hopi estudio tabatin prome cu a formalisa e bunita proyecto aki na 1996, Eman ta splica.
Miles di mayor y muchanan lo wordo perhudica dor di e proceso cu gobierno a inicia cu un carta cu ta ofrece maestronan, dirigentenan y lidernan pa sali for di Tra’i Merdia. E resultado final lo ta cu Tra’i Merdia lo keda bashi y ora e gobierno por haci locual e kier haci, esta elimina Tra’i Merdia despues di 20 aña di exito. Esaki ta algo hopi condenabel, Eman ta expresa.
