“Tur dia e situacion pa e trahado na Aruba ta birando mas y mas dificil. Den un corto tempo costo di bida a explota cu prijsnan cu a bira impagabel pa e pueblo, specialmente esunnan cu entrada mas abao den comunidad”, asina e lider di AVP, Mike Eman a expresa cu un preocupacion grandi.

Segun e ultimo cifranan di Centraal Bureau Statistieken CBS di luna di mei 2019 e componente cuminda/alimentacion (food) a subi cu 12.7%. CBS su publicacion ta bisa:

“Over the last twelve (12) months, the “Food & catering services” has increased by 11.0%. The “Food at home” index showed an increase of 12.7%. The “Potatoes and other tubers” index increased by 48.6%, the largest increase among the “Food at home” food groups”.

Di momento cu Gabinete Wever Croes a introduci su pakete di medida por a mira aumento dramatico den costo di bida. E aumento entre mei di 2017 pa 2018 tabata 6.8%. CBS a raporta na mei 2018:

“Over the last twelve (12) months, the “Food & catering services” has increased by 5.6%. The “Food at home” index showed an increase of 6.8%”.

Tumando e dos aumentonan aki hunto (6.8% y 12.7%) anto mei 2019 por mira cu cuminda a subi cu casi 20% den dos aña di tempo cu efectonan di e medidanan di Gabinete Wever-Croes. Un situacion cruel pa e empleado cu entrada mas margina, e lider di AVP, Mike Eman ta expresa.

Pakico mi ta bisa e empleado? Mike Eman ta splica, pasobra ora bo haci un calculacion di e gastonan presupuestario di un famia pa esunnan di menos recurso e componente cuminda/alimentacion  ta forma proporcionalmente un porcentahe hopi mas grandi di nan gastonan, compara cu un famia cu tin entrada mas halto.

Ora e componente aki  cuminda/ alimentacion (food) aumenta cu 20% e ta un peso hopi pisa pa esunnan di menos recurso.  Un ehempel: Afl. 1500,== na cuminda/alimentacion ta 80% di e salario minimo y ta 50% di un salario di Afl. 3000,== pa luna y ta 33% di un salario di Afl. 4500,==. E impacto ta evidente hopi pisa pa tur hende, pero cruel pa esunnan di menos entrada.

P’esey ora di papia di inflacion, cu ta un cifra averahe, ora ta bisa cu esaki tabata 10% den dos aña, pa un persona cu un presupuesto di salario minimo e aumentonan aki ta pisa hopi mas ora mira cu e componente cuminda, cu ta un parti grandi di un presupuesto familiar cu menos recurso, a aumenta cu 20% den dos aña di tempo.

E situacion aki ta conduci na pobresa, sufrimento y dolor den cas di nos trahadonan na Aruba. Gobernantenan y Parlamentarionan cu ta sostene e gobierno por keda hunga wega di palabra y purba defende y nenga e realidad amargo aki, pero nos cu ta cana den pueblo ta convivi cu e dolor aki di nos hendenan. Nos a trece alivio den pasado y ta prepara pa trece alivio atrobe, e lider di AVP Mike Eman ta finalisa bisando.