Diabierna ultimo cu e acto di entrega di lista di e diferente partidonan dilanti Conseho Electoral a cuminsa e proceso cu ley electoral ta determina pa eleccion di dia 22 di september awor. E di dos proceso tin di haber cu e sosten di firma cu e partidonan cu actualmente no tin representacion den parlamento mester colecta pa asina participa den eleccion venidero. Un acto cu e lider di ABO, Elton Lioe-A-Tjam ta demanda pa bin cu cambio, ya cu e ta considera cu manera e ta actualmente e ta un “obstaculo” pa democracia participativo
Sosten di firma
Di e 10 partidonan – basicamente ta bira nuebe considerando e aliansa entre UPP/PPA – solamente dos di nan, AVP y MEP, no mester di colecta firma. E otro partidonan si mester cumpli cu e exigencia aki contempla den nos ley electoral. Un di e organisacionnan politico nobo considera den e grupo di e “partidonan chikito” cu mester cumpli cu e rekisito aki, ya cu esaki ta e prome biaha cu nan ta participa den un eleccion, ta ABO. Nos leynan ta bisa cu tur e partidonan cu no tin representacion den Parlamento tin cu percura compila e firma di 1% di e cantidad di votadonan valido di ultimo eleccion. Pa e eleccion aki, esey ta un total di 578 hende cu mester duna nan sosten pa participa den e actividad democratico aki.
Sr. Lioe-A-Tjam ta haya cu e exigencia di firma aki ta un obstaculo, ya cu e ta haya logico cu si un partido ta bay eleccion y e no ta gosa di e sosten di e pueblo votado, automaticamente e partido ta disparce. “Pero na momento cu bo ta pone un barera bo ta kies di bisa tambe: Democracia no ta pa tur hende”, el a declara na Bon Dia Aruba.
Bayendo pa loke e lider di ABO ta considera e parti practico, e ta haya cu lo ta mas honesto pa cambia e ley aki. E ta haya mas practico pa exigi e partidonan na momento di entrega di lista pa hunto cun’e entrega un lista cu 600 firmante cu copia di nan ID. E ora ey e comision electoral solamente lo tin e tarea di controla nan.
Facilidad y apertura democratico
E ta argumenta cu tur pais awendia ta aplica e tipo di formula aki, mientras cu na Aruba “nos ta bay molestia pueblo pa abo tin cu bin na un solo luga.” Nos tin varios MFA y bestuurkantoor den e distinto districto cu lo por facilita e proceso aki di colecta di firma. Sr. Lioe-A-Tjam no ta compronde dicon nan no ta habri e facilidadnan aki pa e hendenan por bay den nan bario y duna e sosten na e partido cu bo kier.
“No! Pero si bo ta pone cu tur hende mester bin un solo luga!”. El a pone como ehempel cu si abo ta un persona cu ta biba na San Nicolas y cu abo tin un entrada minimo, abo tin cu bin te Playa pa duna sosten. Ademas bo tin cu paga 3 florin pa bin y 3 florin pa bay. E ta haya cu pa un persona cu un salario minimo, cu e 6 florin aki, e por a cumpra un kipashi pa cria su yiu. “E pregunta ta: cuanto hende humilde lo por haci e sacrificio aki pa duna sosten na e partido cu nan tin confiansa riba dje?”
E ta haya cu e regla aki mester cambia pa uno mas democratico, ya cu practicamente bo ta bisando na tur partido cu nan votado por ta na diferente parti di nos isla, bo no mag di participa si bo no tin e 6 florin.
“Esaki mi ta haya un falta di democracia y mi ta haci un apelacion na tur nos sostenedonan y den general na pueblo, si bo kier tin mas smaak y tin e posibilidad di scoge mas, bin tog firma”, el a bisa. Esaki ta un forma pa duna e partido mas sosten pa asina nos por celebra un eleccion unda nos por tin mas opcion pa scoge algo, segun e lider di ABO.
Sr. Lioe-A-Tjam su opinion ta cu loke tin aworaki ya sea AVP, MEP, POR, tur parce mescos y tur ta ofrece mescos. E lider di ABO ta haya cu e pueblo votado no tin mucho escogencia. P’esey e ta haci un yamada pa tur hende cu ta kere den democracia participativo pa bin acudi y sostene mas partido den eleccion venidero pa bo tin algo mas di scoge dia di eleccion venidero.
