Basicamente tur cos ta cla pa e debate politico cu Camara di Comercio di Aruba (KvK) ta bin promoviendo entre e diferente partido cu lo participa den eleccion venidero di dia 22 di september.
Presidente di KvK, Ernst Mohamed a anuncia cu partido ABO no lo participa di e debate aki. Mientras di su banda e lider di ABO, Elton Loe-A-Tjam a declara na Bon Dia Aruba cu e no ta wak e discusion y “tanto atencion cu e partido ABO no ta bay participa”. E ta kere cu un debate no ta nifica cu algo lo cambia; ya cu tin diferente organisacion cu lo por organisa debate imparcial, y eynan partido ABO lo ta presente. E partidonan cu si ta bay participa y nan a confirma nan participacion ta: MEP, AVP, POR, RED, UPP, MAS y PPA. E debate lo tuma luga 8 di juni awor na Marriott ballroom.
E presidente a laga sa cu KvK a tuma contacto cu e lider di ABO varios biaha “pero nos no a haya e contesta”. Considerando cu nan mester sigui cu e programa nan lo sigui cu e debate cerca e partidonan interesa pa participa den dje. Sr. Mohamed a lamenta cu ABO no ta bay participa ya cu ABO tabata un di e partidonan “cu a grita hopi pa participa”. A pesar cu KvK a haci e espacio pero lamentablemente ABO a abstene su mes di participa. “Nos no sa pa ki rason nan no kier participa, pero nos ta sigui”, presidente di KvK a bisa.
E debate aki ta wordo organisa den un ambiente positivo pa suministra informacion for di e lidernan di e diferente partido cu ta bay participa riba e diferente topico cu KvK lo bay trece dilanti, segun Sr. Mohamed.
Partido ABO
Lider di ABO Loe-A-Tjam ta reacciona cu nan ta e unico partido politico cu for di luna pasa, ora cu KvK a organisa nan “certamen di beyesa”, a sali publicamente cu e evento aki tabata privilegiando e partidonan tradicional; y tambe e otronan cu a sali di nan. El a denuncia cu for di inicio di e evento aki tabatin un “discriminacion y clasificacion” caba. E ta agrega cu publicamente ABO pa medio di un articulo a mustra publicamente riba parcialidad di KvK. E ora ey tambe ABO como partido a dicidi di no participa. E no ta compronde e actitud di presidente di KvK den direccion di partido ABO, ya cu publicamente como partido nan a yega di expresa su opinion riba e debate politico aki. “Si bo no sa lesa of abo tambe kier cuminsa manipula cu informacion.”
E ta haya cu despues di e denuncia publico di ABO, KvK a cambia nan postura “pero esey no kiermen cu ainda nos postura a cambia”. E lider di ABO ta reconoce cu berdaderamente despues KvK a invita su partido. ABO a informa KvK cu nan mes consulta cu nan directiva prome, ya cu den “politica vooral na Aruba, bo mester para pa locual bo ta bisa, asina Sr. Loe-A-Tjam ta declara na Bon Dia Aruba. Tambe el a bisa cu KvK a sigui mustra nan imparcialidad ora cu nan a organisa cierto encuentronan sin participacion di tur e partidonan invita den e debate. “Camara tambe a bisa publicamente cu nan ta sostene e vision di un partido pa caya grandi. Mientras cu nos tur sa cu caya grandi a wordo mata.”
E politico Loe-A-Tjam ta bisa cu si nos ta mira esunnan cu ta den e directiva ta liga na e Camara pero tambe na cierto partido. “Seriamente bo tin cu cuestiona bo mes riba e imparcialidad.”
Igualmente e ta bisa cu e echo cu ABO no ta participa den e debate, no ta kita cu partido ABO semper a vocifera su opinion y semper nan ta den pueblo.
Reglanan di bon conducta
Directora di KvK, Sonja Velthuizen a bisa cu e debate lo ta na Papiamento y lo tin reglanan cu e participantenan y e publico mester atende na dje. “Nos tin regla di bon conducta pa publico, pero tambe pa e partidonan politico of e lidernan.* No ta permiti pa bin cu bandera of cualkier otro forma di propaganda politico. Tampoco gritamento no lo ta permiti, e publico mag di aplaudi, pero ora e moderador ta indica. Nan argumento ta cu KvK kier organisa un debate di nivel y tambe brinda oportunidad pa debati diferente topiconan importante pa Aruba.
Tambe lo tin un moderador di e debate aki; y e lo ta encarga pa informa riba e reglanan na publico prome cu e debate lo inicia e anochi ey.
