Facebook ta revelando un moneda digital nobo yama Libra, mientras e compania ta busca pa hisa balor di nan propaganda pa permiti transaccionnan mas facil y pago online, particularmente entre esunnan sin credit card of cuenta di banco.
Libra lo uza e mesun principionan di siguridad y registro cu Bitcoin, e sistema di moneda digital mas popular awendia. Pero a diferencia di Bitcoin, Libra ta sosteni pa varios compania financiero tradicional, incluyendo PayPal, Visa y Mastercard, y lo basa su balor riba monedadnan real manera dollar Mericano y euro. Libra tambe ta enfrenta scutinio adicional tocante privacidad, mirando e record malo di Facebook pa cu esaki.
Kico ta un cryptomoneda of moneda digital?
E ta un forma di placa digital cu ta uza tecnologia di cifrahe pa hacie sigur. Cryptomonedanan ta existi no como moneda of biyete, sino como linea di codigo di computer firma digitalmente. Ta tene record tipicamente den e asina- yama ‘blockchain’.
Hende por warda nan cryptomoneda den cartera virtual cu ta similar na cuenta di banco online. Facebook ta desaroyando un app di cartera pa Libra; otronan tambe por.
Igual na otro cryptomoneda, hende lo por cumpra y bende libras a cambio di moneda tradicional. No ta cla ki suma, si algun, clientenan lo mester paga pa un transferencia asina, maske Facebook ta bisa cu e suma lo ta chikito.
Pakico no uza Bitcoin?
Maske Bitcoin a hala hopi atencion, e no ta uza comunmente. Pa cuminsa, su balor ta fluctua demasiado, nificando cu $100 di bitcoin awendia por bal $300 otro luna – of apenas $2.50. Apenas algun comerciante ta acepta bitcoin como pago.
Facebook ta spera di tene e balor di e Libra stabiel door di mara esaki cercano na monedanan estableci. Facebook tambe ta reclutando socionan. Lyft, Uber y Spotify ya caba a uni e grupo di Libra. Probablemente nan lo acepta libras ora e sistema wordo lansa. Tambe nan lo yuda cu fondo, construccion, y gobierno di e sistema. Esey lo haci Libra menos ‘free-for-all’ cu Bitcoin. Facebook ta bisa cu Libra lo acepta regulacion, pero no a duna detayenan.
Cu mayoria di cryptomoneda, incluyendo Bitcoin, cualkier persona por fia energia di computer pa verifica transaccionnan y pa preveni cualkier persona di gasta e mesun moneda digital dos biaha. Cu Libra, e verificacion inicialmente ta maneha pa companianan fundado, manera Facebook y PayPal. Facebook ta kere cu e maneho cera lo mehora siguridad.
Cryptomoneda ta anonimo?
Maske ta posibel pa ‘trace’ bitcoin y otro cryptomoneda ora nan wordo gasta, doño di e cuenta tras di e transaccion no necesariamente ta conoci. Esey ta haci e monedanan aki un faborito entre cierto criminal cibernetico. Pero tin biaha ta posibel pa mara e transaccion na un persona real cu a cambia e placa digital den placa tradicional.
Si un persona gasta libras ora e ta riba Facebook, ta teoreticamente posibel cu Facebook por vincula esey na un persona real. Facebook ta bisa cu no lo uza data di Libra pa enfoca avisonan, pero cu por comparti data ‘pa tene hende sigur, cumpli cu ley, y provee funcionalidad basico’. Facebook ta creando un subsidiario, Calibra, pa purba tene e operacionnan separa.
Cuminsamento
Ta premira pa lansa Libra publicamente otro aña. Si consumidonan lo acept’e ta otro asunto. Descuentonan potencial ofreci pa Uber y otro socio por ta suficiente pa pone hende sikiera purba e sistema. Pero hopi hende ta haya ta suficientemente facil pa paga pa producto y servicio cu carchi di credito y debito.
Lo por tin miho atraccion cerca hende cu no tin cuenta di banco. Libra por habri e-commerce na nan. Maske Libra lo ta un manera pa Facebook pusha hende pa gasta ora di interactua cu aviso di Facebook, e compania ta bisa cu e moneda lo ta independiente, y no mester un cuenta di Facebook pa uz’e.
