E caso di permiso di un preso pa pasa un tempo cortico cu su famia a lanta hopi discusion. Nos no ta bay discuti aki e detayenan di e caso di e permiso mes. Nos tin un sistema elabora estableci pa atende privilegio provisional pa tur preso, di e delito menos grave na esunnan mas pisa. Cu den e caso aki e autoridadnan concerni a actua corectamente, no ta bay ta parti di e editorial aki.

Loke si nos ta bay trata, ta e hecho cu un parlamentario ta expresa su opinion encuanto e caso aki. Nota bay tanto pa su opinion di e caso specifico aki, pero tocante derecho (y deber) cu e tin pa cuestiona maneho di e ministro responsabel pa e cartera aki. E derecho cu e tin ta consisti di varios aspecto. Un ta cu e mester por haya un contesta adecua di parti di e mandatario, y riba un termino adecua tambe. Si acaso e persona y su partido ta desea di interpela e mandatario riba su maneho, esey ta nan bon derecho como parti di parlamento, y e presidencia mester percura pa esey por tuma luga. Aki nos a toca un tema sensitivo, y no pa prome biaha, cu e presidencia di parlamento aparentemente no tin nada di bisa y ta subordena na deseo di e poder ehecutivo.

Asina ta cu e derecho di interpelacion a bira un frase bashi pa basta tempo caba. No pa prome biaha nos ta opina cu e ministronan mes por defende nan mes, y no mester di un presidente di parlamento pa duna nan proteccion, haciendo reunion normal di parlamento imposibel. Pero, e asunto no a keda na un silencio di banda ehecutivo. Diripiente e persona en cuestion, deteni na KIA, ta haya e facilidad pa expresa su mes dilanti camara di television di e planta nacional, cu gobierno di turno responsabel pa su maneho. Autoridadnan hudicial ta coopera pa duna acceso na e periodistanan pa haci e entrevista, algo cu dificilmente por a tuma luga sin ‘visto bueno’ di e ministro concerni. Kico a sucede aki? A duna posibilidad na un persona encarcela pa duna su opinion tocante un politico, cu ta paga cu placa di pueblo pa duna opinion, irespecto cual esaki ta, unda y ora cu e ta haya esey adecua.

Nos no ta bay comenta tocante e contenido di e entrevista, si tabatin elemento aden cu por considera menasante pa e politico. Si esey ta asina, nos conoce e politico como un persona hopi capaz pa cana e caminda di husticia pa haya su rason. E no mester di nos den esey. Pero awor e punto cardinal di e asunto manera nos ta mir’e: e canal di television, nos por supone, a actua manera nan a actua, pasobra nan ta basa nan mes riba e derecho y libertad di expresion di e preso cera na KIA. Nos no ta ni bay discuti aki si e permiso cu e dirigencia di KIA a duna, cu of sin orden di e ministro, pa tene e entrevista, ta duna corectamente. Si nan ta haya cu si, esey ta habri caminda pa den futuro mas preso, independiente di e delito cu nan a comete, por haya bos for di prizon, basa riba e precedente aki. Si no ta e idea pa di awor en adelante duna oportunidad na mas persona interna na KIA pa dirigi palabra na comunidad, gustosamente lo nos ta desea di scucha e argumentonan cu ta maneha pa esaki.

Pero, tur esaki no ta e clave den e asunto aki. E clave ta cu un politico ta haci loke ta paga su persona pa haci, no ta haya oportunidad di confronta esun politicamente responsabel den e debate normal, pero ta keda confronta cu e preso cu ta haya e oportunidad pa dirigi palabra, menasante o no, na e politico, na television nacional. Wel, nos tabata sa cu na Aruba hopi di nos ta bon den inventa novedad, pero esun aki si a gana premio! Pero loke ta perde di bista ta cu e confrontacion di e politico, cu su derecho di opina, cu e persona encarcela, hamas por ta substitui e confrontacion politico cu e mandatario responsabel. Ta e debe e politico un contesta. Loke e mandatario mester por haya, si e tin contesta satisfactorio, ta cu prensa obhetivo ta dun’e e rason ey. Pero como mandatario bay sconde tras di un persona cu, independiente di e hecho si e mag dirigi palabra na otro ciudadano for di prizon o no, menasante o no, ta nada mas ni nada menos cu core pa bo responsabilidad politico.

Den un par di siman di tempo nos a mira e ministro aki trompica grandemente tres biaha caba. Prome e interpelacion cu no a sigui pasobra presidente di parlamento mester a protege. Despues e infame atake riba su ex colega di turismo, sin ningun prueba. Y awor e incidente bergonsoso aki. Si ta libertad di expresion ta e maximo interes den e asunto aki, anto TeleAruba mester mustra su grandeza y concede Evelyn su seis minuut di libertad na e canal aki.